Туындының тұсаукесеріне қаза тапқан полиция қызметкерлерінің туыстары арнайы шақырылды, деп хабарлайды @Pavlodarnews.kz тілшісі.

Қазақстан полициясы күніне арналған салтанатты шара барысында облыстық полиция департаментінде «Мәңгі сапта» атты деректі фильмнің тұсаукесері өтті.

Арнайы көрсетілімге қызметтік борышын өтеу кезінде қаза тапқан полиция қызметкерлерінің ата-аналары, жұбайлары, балалары мен немерелері қатысты.

– Полицей мамандығы – күн сайынғы тәуекел. Қызметке шыққан әрбір қызметкер азаматтардың тыныштығы мен қауіпсіздігі үшін жауап береді. Біздің тарихымызда есімдері ерлікпен жазылған әріптестеріміз бар, – деп атап өтті облыстық полиция департаментінің баспасөз қызметі.

Фильмде қызметтік міндетін атқару кезінде қаза тапқан Ербол Сембаев, Мейрам Даулетов, Қанат Сармантаев, Ерлан Нұржанов, Ахметқали Тезекбаев, Асылбек Бижанов, Фарид Какабаев және Арли Харки туралы баяндалады.

Туындыны әзірлеуге Павлодар гарнизонының қазіргі қызметкерлері мен қаза тапқан полицейлердің туыстары қатысқан. Авторлардың айтуынша, бұл фильмге ерекше шынайылық берген.

Көрермендерге тәртіп сақшыларының жақындары мен әріптестерінің естеліктері ұсынылды. Олар қайғылы оқиғалардан кейінгі ауыр кезеңді қалай өткергендерін және ерлікпен қаза тапқан азаматтардың қандай адам болғанын айтып берді.

– Олардың ерлігі бүгін ант қабылдап жатқан жас қызметкерлер үшін рухани бағдар болып қала береді. Біздің міндетіміз – олардың жарқын есімін сақтап, ерлігін ұмытпау, – деп атап өтті ведомство өкілдері.

Полиция қызметкерлерінің пікірінше, «Мәңгі сапта» фильмі қоғам мен құқық қорғау органдары арасындағы сенімді нығайтуға және жас ұрпаққа патриоттық тәрбие беруге ықпал етеді.

Фильм облыстық полиция департаментінің ресми ақпараттық ресурстарында жарияланған.