Рейстер географиясын кеңейту көзделуде, деп хабарлайды @Pavlodarnews.kz тілшісі.

Павлодар әуежайының ұшу-қону жолағын реконструкциялау жұмыстары 98%-ға аяқталды. 1 қыркүйектен бастап әуежайдан Алматы мен Астанаға тұрақты рейстерді іске қосу жоспарланып отыр. Бұл туралы Павлодар облысының әкімі Асайын Байханов мәлімдеді. Әкімнің айтуынша, әуежайдың ұшу-қону жолағы ауқымды реконструкциядан өтіп, оның ені 15 метрге ұзартылды. Қазіргі уақытта негізгі жұмыстар аяқталған, қалғаны – асфальттың ұсақ түйіршікті қабатын төсеу.

- Ұшу-қону жолағындағы жұмыстар бүгінгі таңда 98%-ға аяқталды. Ірі түйіршікті асфальт толық аяқталды. 17 тамызда қабылдау комиссиясы арнайы бақылау ұшуын жүргізеді. Бұл навигациялық сигналдық жабдықты тексеру үшін қажет, – деді Асайын Байханов.

Оның сөзінше, әуежай 25 тамызға қарай пайдалану құжаттарын толық алуды жоспарлап отыр. Осыдан кейін рейстер географиясын кеңейту көзделген.

- Алдымен Алматы мен Астананы іске қосқымыз келеді. Кейін бағыттар географиясын кеңейтеміз, – деді облыс әкімі.

Сонымен қатар Павлодардан шетелге тікелей рейстер ашу мәселесі қарастырылып жатыр. Атап айтқанда, Ташкент–Павлодар–Новосібір және Новосібір–Павлодар–Ташкент бағыттары бойынша келіссөздер жүргізілуде. Әкімнің айтуынша, Ташкент тарапымен келіссөздер аяқталуға жақын, ал Новосібір тарапы да бұл бастаманы қолдап отыр.

Павлодардан Ақтөбеге рейс ашу мәселесі де талқылануда. Асайын Байхановтың айтуынша, екі өңірдің арасында іскерлік және экономикалық байланыстар тығыз болғандықтан, бұл бағыт перспективалы болуы мүмкін. Рейсті ашу үшін шығындарды Павлодар мен Ақтөбе облыстарының тең үлеспен субсидиялау мүмкіндігі қарастырылып жатыр.

Бұдан бөлек, авиакомпанияларға Шымкент пен Маңғыстау бағыттарын да пысықтау ұсынылған. Облыс әкімінің пікірінше, бұл бағыттар туристік әлеуеті тұрғысынан Павлодар үшін маңызды. Павлодар әуежайының бағыттар желісін кезең-кезеңімен кеңейту өңірдің көлік қолжетімділігін арттыруға және ішкі әрі халықаралық әуе қатынасын дамытуға мүмкіндік бермек.