Жеңімпаздар жоғары оқу орындарының грантына қол жеткізді, деп хабарлайды @Pavlodarnews.kz тілшісі.

Облыстық білім басқармасының баспасөз қызметінің мәлімдеуінше, жалпы білім беретін пәндер бойынша республикалық ғылыми жобалар конкурсы 26 ақпан - 1 наурыз аралығында Тараз қаласында Ж.Үшкемпіров атындағы «Тараз-Арена» спорт кешені базасында өтті. 

- Конкурс халыкаралық тәжірибеге сай ашық көрме үлгісінде барлық санитарлық, медициналық, өрт қаупсіздігі және қоғамдық тәртіп нормалары қатаң сақталып өткізілді. Байқаудың республикалық кезеңіне 19 секция бойынша 679 жобамен 867 оқушы қатысты.  Павлодар өңірінен облыстық кезеңінің 32 жеңімпазы мен жүлдегерлері 25 жобамен қатысты, - делінген хабарламада.

Республикалық ғылыми жобалар конкурсының қорытындысы бойынша күміс медальмен және ІІ дәрежелі дипломмен Екібастұз қаласының № 1 лицей-мектебінің 11-сынып оқушылары Юлия Зарапина (тіл білімі секциясы -орыс тілі) және Анна Каськова (тіл білімі секциясы–ағылшын тілі) және Екібастұз қаласының №25 қазақ қыздар гимназиясының 10-сынып оқушысы Назгуль Манатова (тіл білімі секциясы –қазақ тілі) иеленді.

Қола медальға Ы.Алтынсарин атындағы облыстық қазақ гимназия-интернатының 11-сынып оқушылары Нұрасыл Бақтыбаев және Нұрсәуле Көбей (қолданбалы математика секциясы), Ы.Алтынсарин атындағы облыстық қазақ гимназия-интернатының 9-сынып оқушылары Ернар Абылғазы, Сұлейман Серікпай (математика секциясы), Екібастұз қаласы № 1 лицей-мектебінің 10-сынып оқушы Владимир Ковалев (қолданбалы математика секциясы), Айдана Садартинова және Сабина Бауен, Павлодар қаласының Жұмабек Тәшенев атындағы жалпы орта білім беру мектебінің 11-сынып оқушылары (адам және қоғам секциясы) марапатталды.

Аталмыш байқаудың жеңімпаздары ректордың білім грантының иегерлері атанды. Соның ішінде Екібастұз қаласының №1 мектеп-лицейінің 11-сынып оқушысы Юлия Зарапина Астана халықаралық университетінің, Ы.Алтынсарин атындағы облыстық қазақ гимназия-интернатының 11-сынып оқушылары Нұрасыл Бақтыбаев және Нұрсәуле Көбей Торайғыров университетінің грантына ие болды.