Шарбақты аудандық соты қоғамдық орында тәртіп бұзған қала тұрғынына қатысты әкімшілік істі қарады, деп хабарлайды @Pavlodarnews.kz тілшісі.

Сот мәліметінше, жаз айында Павлодар қаласының 1971 жылы туған тұрғыны Көлбұлақ ауылындағы Маралды көлінің демалыс аймағында мас күйде қызметтік үй-жайда болған. Ол қоғамдық орында жәбірленушіге былапыт сөздер айтып, агрессивті әрекет көрсеткен.

Сот отырысында құқық бұзушы өз кінәсін толық мойындап, өкініш білдірді.

Іс материалдарын қараған сот оны ӘҚБтК-нің 434-бабының 1-бөлігі (Ұсақ бұзақылық) бойынша кінәлі деп таныды. Жауаптылықты жеңілдететін мән-жайларды ескере отырып, ӘҚБтК-нің 829-11-бабының 2-бөлігі негізінде әкімшілік айыппұл сомасы 30 пайызға қысқартылып, 60 550 теңге мөлшерінде белгіленді.

Сот қаулысы заңды күшіне енді.