Бұл күні еңбек ардагерлері, тәжірибелі шеберлер, тәлімгерлер мен жас мамандарға құрмет көрсетілді, деп хабарлайды @Pavlodarnews.kz тілшісі.

ERG Service Павлодар машина жасау зауытының қызметкерлеріне арналған кәсіби мереке салтанатты түрде өтті. Үздік машина жасаушылар салалық және корпоративтік марапаттарға ие болды. Ал кәсіби мамандар мен болашағынан үміт күттіретін жас қызметкерлердің есімдері Құрмет тақтасы мен «Біздің болашағымыз» тақтасына енгізілді.

ERG Service бас директоры Евгений Ефименко ұжымға еңбегі мен ортақ іске қосқан үлесі үшін алғыс білдірді.

– Бүгін барлық еңбеккерлерге, марапатқа ие болатын жандардың барлығына шынайы алғысымды білдіргім келеді. Адал еңбектеріңіз үшін ризашылығымды айтамын. Сіздер өндірісте өздеріңіздің бір бөлшектеріңізді қалдырып, біз шығаратын жабдықтарға, жөндеу жұмыстары мен өнімдерге жан жылуларыңызды қосып келесіздер, – деді Евгений Ефименко.

Марапатталғандардың қатарында зауыттағы түрлі мамандық иелері мен әр буын өкілдері бар. Кәсіпорын қызметкерлері көпжылдық еңбегі, кәсіби шеберлігі және өндірісті дамытуға қосқан үлесі үшін марапаттар мен Алғыс хаттарға ие болды.

ERG Service жұмысының топ кәсіпорындары үшін маңызы туралы дивизион өкілдері де айтты. Энергетикалық дивизионның басшысы, «Еуроазиаттық энергетикалық корпорация» АҚ бас директоры Дүйсен Мерғалиев компания мамандарының тікелей қатысуымен жүзеге асырылып жатқан ірі жобалар туралы баяндады.

Солардың бірі – конвейерлерді ауыстыру жөніндегі ауқымды бағдарлама. Бір конвейер толығымен ERG Service кәсіпорнында жасалып, станция мамандарымен бірлесіп өндіріске орнатылды. Қазір жабдық сәтті жұмыс істеп тұр. Бұдан бөлек, білікті диірмендерді балғалы диірмендерге ауыстыру бағдарламасы жүзеге асырылуда. Биыл бір диірмен жасалып, орнатылды, екіншісін монтаждау жұмыстары жүріп жатыр. Келесі жылы тағы төрт диірменді ауыстыру жоспарланған. Сондай-ақ ERG Service жетінші энергоблокты қайта жаңғыртуға қатысып, ауқымды жұмыс атқаруда.

Зауыт өнімдеріне сұраныстың жоғары екенін ERG-дің басқа кәсіпорындарының өкілдері де атап өтті. Атап айтқанда, серіктес кәсіпорындардың біріндегі крандар паркінің шамамен 70 пайызын ERG Service Павлодар машина жасау зауытында шығарылған жабдықтар құрайтыны айтылды.

ERG Service Павлодар машина жасау зауытының директоры Евгений Ивченко кәсіпорын дамуының негізінде ең алдымен адамдар тұрғанын атап өтті.

– Машина жасаушы болып тумайды – машина жасаушы болып қалыптасады. Бұл жолдағы ең бастысы – өз орныңды табу, өз ісіңді және әріптестеріңнің жұмысын түсіну, – деді ол.

Директордың айтуынша, өндіріс біртіндеп өзгеріп келеді, ал ұжымның өз жұмысын үнемі жетілдіруге деген ұмтылысы алға жылжуға мүмкіндік береді. Бұл үдерісте идеялары кейін тікелей цехтарда жүзеге асатын жас инженерлер мен мамандардың орны ерекше.

Мерекенің басты тақырыптарының бірі – ұрпақтар сабақтастығы болды. ERG Service компаниясында тәлімгерлерді халықаралық валидациядан өткізу бойынша пилоттық жоба жүзеге асырылды. Қызметкерлер оқудан өтіп, электр-газбен дәнекерлеуші мамандығы бойынша тәлімгерлік құзыреттерін растады.

Кәсібилігі, шеберлігі және өндіріске қосқан үлесі үшін Сергей Жигулин, Дархан Белгожанов, Арсланбек Батыржанов, Нафис Ибатуллин, Борис Кучма және Самат Бисенгазиевтің есімдері Құрмет тақтасына енгізілді.

Сонымен қатар, кәсіпорынның алдағы дамуына үлес қосады деп сенім артылған қызметкерлері де марапатталды. Жас мамандар кәсіби әлеуеті, дамуға деген талпынысы және жаңа нәтижелерге қол жеткізуге ұмтылысы үшін «Біздің болашағымыз» тақтасынан орын алды.

Жас мамандар арасында өндірісті дайындау жөніндегі инженер Дмитрий Головянко да ерекше аталды. Бастамашылдығы, жауапкершілігі және көшбасшылық әлеуеті үшін ол «Жастар көшбасшысы» грамотасымен марапатталды. Кейін Дмитрий сахнаға басқа қырынан шығып, зауыттағы әріптестеріне Отан туралы әнді тебірене орындап берді.

Өндірістік көрсеткіштер, күрделі жабдықтар мен ауқымды жобалардың артында зауыт еңбеккерлерінің қарапайым өмірлік оқиғалары тұр. Солардың бірі – Елена Тарасованың еңбек жолы. Ол Павлодар машина жасау зауытының құю-механикалық цехындағы ұсталық бөлімшеде балғалар, престер мен манипуляторлардың машинисі болып жұмыс істейді. Кәсіби мереке құрметіне Елена ERG Service компаниясының Құрмет грамотасымен марапатталды.

Елена зауытқа 2013 жылы келген, ал машинист болып 2015 жылдан бері еңбек етіп жүр. Ол өз еңбегінің нәтижесін – қарапайым металл дайындаманың біртіндеп дайын бұйымға айналғанын көргенді ұнатады.

– Қарапайым металл кесегінен фланец, болт жасаймыз. Мұның бәрі балғамен соғылып жасалады, – деді Елена Тарасова.

Бүгінде ол жас қызметкерлердің кәсіпке бейімделуіне өзі көмектеседі. Жақында бөлімшеге 23 жастағы қызметкер келген. Бұған дейін слесарь болып еңбек еткен ол оқудан өткеннен кейін ұсталық кәсіпті меңгерді. Елена зауыт ұжымы туралы ерекше ықыласпен айтып, әріптестерінің тату, ақжарқын әрі әрдайым көмекке дайын екенін атап өтті. Кәсіби мерекеде ол әріптестеріне денсаулық, жаңа жетістіктер, сәттілік пен амандық тіледі.

Техникалық бақылау және сынақ зертханасы бөлімінің дәнекерлеу жұмыстарын бақылаушысы Айгүл Азаматова да мерекелік шараның ұйымдастырылуын жоғары бағалады. Осыдан он жылдан астам уақыт бұрын ол әйелдер сирек таңдайтын мамандықты игеруден қорықпаған. Бүгінде Айгүл туған кәсіпорны туралы ризашылықпен айтып, зауыт пен ERG Service-тің барлық дивизиондарына одан әрі өркендеу тіледі.

Мерекелік көңіл күйді шығармашылық бағдарлама толықтырды. Сахнада заманауи және этникалық сарындар тоғысып, көрермендер «Қара жорға» биін, музыкалық нөмірлер мен креативті бейнероликтерді тамашалады.

Осылайша кәсіби мереке ондаған жыл бойы станоктар мен өндірістік жабдықтардың жанында еңбек етіп жүрген мамандарды, тәжірибесін жастарға үйретіп жүрген тәлімгерлерді, инженерлік шешімдер әзірлейтін қызметкерлерді және машина жасау саласындағы еңбек жолын енді бастап келе жатқан жас мамандарды бір ортаға тоғыстырды.

Фотосурет ERG Service баспасөз қызметінен алынды

Серіктестік материал