Бүлдіршіндерді дамытатын мобильді ойын АҚШ, Үндістан елдерінде сұранысқа ие, деп хабарлайды @Pavlodarnews.kz.

«IBars kids» ойынның авторлары – Павлодар облысының тумалары Алтынбек Сұлтанқұлов және Қазбек Сағидолда. Олар білім саласында тоғыз жылдан астам еңбек етіп жүр. Бүгінде ІТ саласындағы жобаларды қолға алып жатыр.  

–  Бұл ойынның шығуының бірден-бір себебі – балаларға арналған сапалы, пайдалы контенттің жоқтығы. Оның ішіндегі қазақ тіліндегі контент тіптен жоқ, – деді Алтынбек Сұлтанқұлов. 

Алтынбек пен Қазбек бұл мобильді қосымшаны әзірлемес бұрын алты ай уақыт көлемінде көптеген зерттеу мен сауалнамалар жүргізген. 

–  1200-ге жуық балабақша тәрбиешілерінен сұхбат алдық. Сауалнаманың қорытындысы ата-аналардың 70 пайызы балалар YouTube көреді деп жауап берген.  Ал 20 пайызы  2-3 жас аралығындағы балалар түстер мен фигураларды ажырата алмайды деген еді, – деп атап өтті спикер. – Демек, балалар арасында бұл мәселе өте өзекті. Сондықтан бұл мәселелерді шешу мақсатында «IBars kids»  атты ойынды құрастырдық.

Ойын 2 мен 5 жас аралығындағы балалардың интеллектуалды ойлау қабілетін дамытуға арналған. Тапсырмалар баланың жас ерекшелігіне сай ҚР Мектепке дейінгі тәрбие мен оқытудың үлгілік оқу бағдарламасы негізінде құрастырылған. Оны 10 жылдан астам еңбек өтілі бар тәжірибелі ұстаздар мен балабақша әдіскерлері жасаған.

Ойын дизайнында баланың психологиялық қабылдауын ескере отырып, арнайы түстер мен сапалы анимация  қолданылды. Бүгінде ойында «Интеллект», «Логика», «Қызықты боямақ», «Есте сақтау» және «Математика» бөлімдері бар. Ойын қазақ, орыс және ағылшын тілдерінде жүреді.

–  Тапсырмалар арнайы жас ерекшелігіне сай құрастырылған. Яғни 2-3, 3-4,4-5 жастағы балалар әртүрлі тапсырмаларды орындайды. Біздің ойынды ойнау арқылы түстерді, фигураларды ажыратуды, топтастыру, логикалық және еске сақтау қабілеттерін дамытады. Сондай-ақ, баланың функционалдық сауаттылығы дамиды. Яғни, алған білімін күнделікті өмірде қолдана алады деген сөз, – дейді Алтынбек Сұлтанқұлов.

Баланы қызықтыру мақсатында арнайы геймификация әдісі қолданылды. Ойын плафтормасының негізгі кейіпкері – барыс әртүрлі кедергілерге жолығады. Осы кедергілерден өту үшін бала тиісті тапсырманы орындау қажет. 

Алтынбектің айтуынша, «Ibars kids» деген атауының өзіндік ерекше мағынасы бар.

–  Негізі бұл атаудың үш себебі бар. Біріншісі, барыс – қазақтың символы, екіншісі – барыс таулы аймақта, биік шыңда мекендейді. Біздің ойынды ойнаған балаларымыз да білім жолында биік белестерді бағындырсын деген ниет болды. Ал үшіншіден, барыс сирек кездесетін жануар, сондықтан балаларымыз да дана, дара болсын деп осылай атадық, – деді спикер.

Ойын құрастыруышының сөзінше, мобильді қосымшаның жұмыс істеп жатқанына үш ай ішінде үш мыңға жуық қолданушы қосымшаны жүктеп, ойнап жатыр.

–   Үш мың қолданушының 10% АҚШ-қа тиесілі. Сондай-ақ біздің ойынымызды Филлипин, Үндістан, Қырғыстан елдерінде де жүктейді, – деді  Алтынбек Сұлтанқұлов.

Қазіргі таңда ойынның құрастырушылары тек «IBars kids»  жобасымен ғана шектелген жоқ.

– Озат онлайн деген білім беру платформасын іске асырып жатырмыз. Ол жерде балалар зияткерлік мектептерге түсуге дайындық жүргізеді, сонымен қатар ҰБТ-ға дайындалады, – деді Алтынбек. 

Зияткер алдағы уақытта білім саласында көптеген жоспарлар құруда. 

«IBars kids»  ойынын әзірге тек Google Play платформасы (Android) арқылы жүктеуге болады. Жақында App Store-ға (IOS) шығады.

Айта кетерлігі, кеше Президент Қасым-Жомарт Тоқаев Павлодар облысына келген жұмыс сапары кезінде бастамашыл, креативті жастармен кездесті. Оның ішінде  «IBars kids» негізін қалаушылар  Алтынбек Сұлтанқұлов  пен Қазбек Сағидолда Мемлекет басшысына республикалық және халықаралық деңгейге шыққан мобильді дамыту ойыны туралы айтып берді.

Фото: Алтынбек Сұлтанқұлов ұсынды