Енді тәртіп сақшылары қызметін Chevrolet Nexia маркалы жаңа көлікпен жүріп атқаратын болады, деп хабарлайды @Pavlodarnews.kz.

Облыс әкімінің баспасөз қызметінің мәлімдеуінше, қоғамдық қауіпсіздікті қамтамасыз ету, сапалы сервистік қызметтер көрсету үшін облыс әкімі Асайын Байханов полицейлерге Chevrolet Nexia маркалы 20 қызметтік автокөліктің кілтін табыс етті. Бұл көліктер учаскелік полиция инспекторлары мен патрульдік полиция батальонына, рота инспекторлары арасында таратылатын болады. 

Учаскелік полиция инспекторы өз қызметінің түрі бойынша халықпен тығыз қарым-қатынас жасайды. Өзінің әкімшілік учаскесінде бір адамға көптеген міндеттер жүктелген. Мәселен, отбасылық қиыншылықтарды, жанжалдар мен көршілер арасындағы дауларды шешеді, сенімсіз азаматтардың есебін жүргізеді, абаттандырудың бұзылу фактілерінің жолын кеседі.
Ал батальон инспекторлары тәулік бойы аулалар мен көшелерді патрульдеуді қамтамасыз етеді. “102” операторының пультіне келіп түсетін шақыртуларға шығады. Бұл қызметтерді автокөлікпен жабдықтау қажет және ол азаматтардың өтініштеріне жедел кірісуге мүмкіндік береді.

– Өмірдің қиын сәттерінде халық сіздерге жүгінеді, өйткені олар сіздерді әділеттіліктің тірегі мен символы ретінде көреді. Алдағы уақытта да Павлодар полициясы облыс тұрғындарының құқықтарын лайықты қорғайтынына, ал жаңа қызметтік автокөліктер қоғамдық тәртіпті одан әрі нығайтуға және қылмысқа қарсы күреске қызмет ететініне сенімдімін, – деп атап өтті аймақ басшысы.

Полиция департаменті бастығының бірінші орынбасары Жасқайрат Қайыров облыс басшылығына ішкі істер органдарының мәселелерін үнемі назарда ұстайтынын айтып, алғысын білдірді.

Шара соңында жарық пен дабыл сигналы қосылған жаңа автокөліктердің салтанатты шеруі өтті.