Облыста зертханалық зерттеулер жүргізу үшін ауызсумен жабдықтау объектілерінен су сынамаларын алу жалғасуда, деп хабарлайды  @Pavlodarnews.kz тілшісі.

Облыстық санитарлық-эпидемиологиялық бақылау департаментінің мәліметінше, аймақта су тасқыны кезеңінде санитарлық-эпидемиологиялық жағдайдың асқынуын болдырмауға бағытталған, ауызсудың сапасын зертханалық бақылауды қамтитын ұйымдастырушылық-тәжірибелік шаралар кешені жүргізілуде. 

– Ақтоғай аудандық санитарлық-эпидемиологиялық бақылау басқармасы су тасқыны кезеңінің басынан бері ауызсумен жабдықтау объектілерінен микробиологиялық және санитарлық-химиялық көрсеткіштері бойынша 42 су сынамасын зертханалық тексеруден өткізді. Су басқан аумақтарда сәйкессіздіктер анықталған жоқ, – дейді департаментте.

Ақтоғай ауданының елдімекендеріне шығу барысында тұрғындар арасында құдықтарды жуу және дезинфекциялау, зертханалық зерттеулерден кейін ғана ауызсуды пайдалану, сондай-ақ аумақты тазалау, су басқан ауладағы дәретханаларды тазалау және дезинфекциялау, жеке гигиена ережелерін сақтау қажеттілігі  жөнінде әңгімелер жүргізілуде. 

Еске сала кетейік, эпидемиологтар су тасқыны кезінде қайнатылған су ішуге кеңес берген.