Заманауи білім ошағы барлық қажетті құрал-жабдықпен қамтамасыз етілген, деп хабарлайды @Pavlodarnews.kz.

Ауыл тарихында ерекше күн – жаңа мектептің ашылу салтанаты өтті. Салтанатты шараға Павлодар облысының әкімі Асайын Байханов, ауыл ақсақалдары, ұстаздар, ата-аналар мен оқушылар қатысты. Мектептің құрылысы сапалы әрі қысқа мерзімде аяқтады. Жаңа нысан 70 оқушыға және 20 балаға арналған шағын орталыққа есептелген. Жалпы аумағы – 1280 шаршы метр. 

Мектеп директоры Айнұр Бекпауованың айтуынша, мектепте 52 оқушы білім алады, 17 мұғалім еңбек етуде. Мектеп жанындағы шағын орталықта 10 бала тәрбиеленуде. Оқу орны спортзалмен, акт залымен, интерактивті физика, химия, биология кабинеттерімен жабдықталған.

– Бұрынғы мектепте спортзал болмаған еді. Қазір балаларға барлық жағдай жасалды. Бұл – ауыл өміріндегі үлкен қуаныш, – деді мектеп директоры.

Аудандық білім бөлімі әдістемелік кабинетінің меңгерушісі Гүлшат Батталова жаңа мектептің ерекшелігі ретінде заманауи технологияларды, соның ішінде жасанды интеллектіні білім беру процесіне енгізуді атады.

– Мектепте 3D-принтерлер, жаңа интерактивті құрылғылар бар. Алдағы уақытта ұстаздар арнайы курстардан өтіп, жасанды интеллектіні оқу сапасын арттыруға пайдаланады, – деді ол.

Сонымен қатар, Павлодар облысының әкімі Асайын Байханов мектептің ашылуында сөз сөйлеп, Мемлекет басшысының тапсырмасына сәйкес ауыл балаларына сапалы білім беру үшін барлық жағдай жасалып жатқанын атап өтті.

– Көктемде Тілектес ауылының халқымен кездескенде өзіміздің тарапымыздан сөз беріп, жаңа білім шаңырағын көтереміз деген уәде болды. Баршаңызға жаңа мектеп құтты болсын. Ауылымызда болашақта елге қызмет ететін азамат пен азаматшалар осы мектептен де қанаттанып шығады деп сенемін, – деді ол.

Жаңа мектептің ашылуы – тек білім саласындағы ғана емес, ауылдың әлеуметтік дамуы жолындағы үлкен қадам.