«Қайнар» оқу-сауықтыру кешенінде өткен салтанатты шарада 40-тан астам азамат медальдар және Алғыс хаттармен марапатталды, деп хабарлайды @Pavlodarnews.kz.

Облыс әкімі Асайын Байханов Алғыс айту күнін екібастұздықтармен бірге қарсы алды.  Аймақ басшысы әр салада адал еңбек етіп,  белсенді азаматтық ұстаным көрсетіп жүрген облыс тұрғындарына алғысын білдірді.

– Қыста болған қиын жағдайда екібастұздықтарға шыдамдылық пен төзімділік танытқаны үшін, сондай-ақ төтенше жағдайды жоюға атсалысқан жөндеу бригадаларының жұмысшыларына, кең пейілді жандарға ерекше алғыс айтқым келеді, – деді облыс әкімі.

Pavlodarnews тілшілері қаланың көпқабатты үйлердің қатып қалған жылу жүйелерін жылытып, жертөлелерде сынған құбырларды ауыстырған қарапайым жұмысшы мамандық иелері туралы бірнеше рет жазған болатын. Дәл осы батырлар «Қайнар» оқу-сауықтыру кешенінде құрметке ие болды. 

Еңбегі мемлекеттік наградамен, «Ерең еңбегі үшін» медалімен марапатталғандардың қатарында Екібастұз ГРЭС-1 электр дәнекерлеушісі Данияр Әлкенов, «Богатырь Көмір» ЖШС слесарі Оралбек Мұзданов,  «KAZ Minerals Bozshakol»  ЖШС  слесарь-жөндеушісі Жанарбек Әбуов, «Зуев»  ЖК сантехнигі Владимир Кузнецов бар.

Апаттан кейінгі алғашқы күндері тұрғындарға жылуды қалпына келтіруге көмектескендердің бірі – сантехник Владимир Кузнецов. Ол тәжірибелік көмектен бөлек, кеңес берді. Демеушілер мен жанашыр жандар  құрылыс фені, көлік және құрғақ киімдер сияқты қажетті заттардың бәрімен  қамтамасыз  етті. 

– Тоғыз күн бойы ұйықтамау өте қиын болды, тіпті есіме алғым да келмейді, – деді  Владимир Кузнецов. – Жылына бастағанда үйге қайтып жүрдік. Таңертең үйге дымқыл болып оралатынбыз. Жүріп келе жатқанымда киімдерім қатып қалды. Күніне бір сағаттан артық ұйықтамадық.

Владимир Кузнецов  бұл ісін ерлік деп санамайды. Оның айтуынша, мұндай іске ақша табу емес, адамдарға көмектесу ниеті жетелеген.

Екібастұздық №4 кәсіптік лицейді бітірген. Дипломы бойынша газ-электр дәнекерлеушісі, сантехник кәсібін өз қызығушылығымен игерген.

– Әкем маған бұл істі алты жастан бастап үйреткен. Барлық жертөлелерді жатқа білемін, – деді ол.

Төтенше жағдай кезінде жылусыз, жарықсыз қалған екібастұздықтар «Савой» қонақ үй кешенін паналады. Апатты жоюшылар, сондай-ақ қарттар мен балалар осы жерден ыстық түскі аспен қамтамасыз етілді.  Қонақ үйде күніне орта есеппен 500-ге дейін адам таңғы ас, түскі және кешкі ас  ішіп жүрді. Көшеде жұмыс істейтін жөндеушілерге азық-түлік жеткізілді. Кешен директоры Шаттық Сүйінішева «Облыс алдында сіңірген еңбегі үшін» төсбелгісімен марапатталды.

Қала басшылығы жөндеу бригадаларының жұмысы назардан тыс қалмайды деп уәде берді. Екібастұз қаласының әкімі Аян Бейсекин сыйлықтар, Құрмет және Алғыс хаттар, медальдар мен мемлекеттік наградалар сияқты түрлі бағытта ынталандыратындарын атап өтті.

«Еуразиялық энергетикалық корпорация» АҚ газ-электр дәнекерлеушісі Даниал Қайыртайдың айтуынша, ТЖ кезінде  қиын жағдайда жұмыс істеуге тура келген.

–  Біз жертөлелерде, лай орындарда жұмыс істедік. Өте қорқынышты болды.  Біз бұл төтенше жағдайдағыдай көшбасшыларды жиі көрген емеспіз. Директор бізден әрдайым жұмысшылардан не қажет екенін сұрап тұрды. Енді мұндай жағдай қайталанбаса екен, –  деп тіледі Даниал Қайыртай.

Айта кетейік, сонымен қатар «ДомЭнергоСет» ЖШС электр монтеры Айдар Зайнышевке, «VITA» іздестіру тобының еріктісі Самал Дүйсенбаеваға, «ГИДРОПРОМ» ЖШС құрылыс учаскесінің бригадирі Андрей Истомахинге ел Президентінің Алғыс хаттары табысталды.