11 шілде күні Павлодардың «Ертісі» Қазақстан Премьер-лигасының 17-туры аясында өз алаңында елордалық «Жеңісті» қабылдайды, деп хабарлайды @Pavlodarnews.kz тілшісі.

Бірінші айналымда командалар «Астана Аренада» кездесіп, 0:0 есебімен тең тарқасқан болатын. Енді павлодарлықтар өз жанкүйерлерінің алдында маусымдағы маңызды ұпайларға қол жеткізуге тырысады.

«Ертіс» үшін биылғы маусым өте ауыр өтуде. Команда турнир кестесінің соңғы сатысында келеді және нәтижелері үшін жанкүйерлер мен футбол мамандарының өткір сынына ұшырауда. Клубта бапкерлер жиі ауысып, ойыншылар құрамы да тур сайын өзгеріп жатыр. Басшылық пен жаттықтырушылар штабы қиын жағдайдан шығудың жолын іздеп, команданы қайта құруға мәжбүр. Сондықтан әрбір матч павлодарлықтар үшін шешуші маңызға ие.

Ал «Жеңіс» маусымды әлдеқайда тұрақты өткізіп келеді. Астаналық ұжым ең алдымен тәртіпке негізделген қорғанысымен ерекшеленеді. Команда қорғаныста сауатты ойнап, қарсыластарына көп мүмкіндік бере бермейді. Тәжірибелі футболшылар Исламбек Қуат, Иван Шараванья және Марат Быстров ойынның тепе-теңдігін сақтаса, шабуылда Лука Имнадзе, Элдер Сантана мен Адилио жылдамдығы және жеке шеберлігі арқылы қауіпті сәттер ұйымдастыра алады.

Дегенмен «Жеңістің» де әлсіз тұстары бар. Команда гол соғатын мүмкіндіктерді тиімді пайдалана бермейді, әсіресе сырт алаңдағы кездесулерде шабуылдағы өнімділігі төмендеу. Сол себепті елордалық клубтың қатысуымен өтетін матчтардың басым бөлігі тартысты әрі голға аса бай бола бермейді.

Матч күні жанкүйерлер үшін арнайы ойыналды мерекелік бағдарлама ұйымдастырылады. Келушілерге шайдың тегін дегустациясы ұсынылып, тегін балмұздақ таратылады. Ал матч билеттерін «Яндекс Афиша» сервисі арқылы сатып алуға болады.

«Ертіс» ұзаққа созылған дағдарыстан шығып, өз жанкүйерлерін қуанта ала ма, әлде ұйымдасқан ойын үлгісін көрсетіп жүрген «Жеңіс» тағы да ұпай еншілей ме? Бұл сұрақтың жауабы 11 шілде күні сағат 17:00-де белгілі болады.