Көктөбе ауылындағы Ерсін Мұқашев атындағы жалпы орта білім беру мектебінде инклюзивті кабинет ашылады, деп хабарлайды @Pavlodarnews.kz тілшісі.

Май ауданының әкімі Қадылжан Сәтиев баспасөз конференциясында 2025 жылы ауданда атқарылатын жобаларды таныстырды.

–   Майтүбек жалпы орта білім беру мектебі және Қаратерек жалпы орта білім беру мектептерінде күрделі жөндеу жұмыстары жүргізіледі, – деді ол.

Әкімнің айтуынша, аудан бойынша оқушылар контингенті 1578 – ді құрайды. 0-ден 6  жасқа дейінгі 600 бала бар, оның ішінде 383-і – 3-тен 6-ға дейінгі жастағы балалар. 11 мектептің 85,6%-ы қазақ тілінде оқытылады.

Тоғыз мектепте мүмкіндігі шектеулі 76 оқушыға инклюзивті білім беру үшін жағдай жасалған. Ауданның барлық мектебі компьютерлермен қамтылған, олардың жалпы саны 1 288 бірлікті құрайды, оқу процесінде – 1 223 бірлік, бір компьютерге 1,3 оқушыдан келеді.