Жергілікті билік жұмысты жеделдету үшін қаржы табуға уәде берді, деп хабарлайды @Pavlodarnews.kz тілшісі.

Облыста он спорт нысаны, оның ішінде Баянауыл ауылында кешен салынуда. Облыстық құрылыс басқармасының басшысы Асқар Әжмұраттың айтуынша, жұмыс 75 пайызға орындалып, ішкі әрлеу жұмыстары жүріп жатыр. Бұл туралы облыс әкіммен бірге өткен аппарат отырысында айтылды.

Сәуір айында Пещаное, Байет, Қоянды және Жаңатілек ауылдарында дене шынықтыру-сауықтыру кешендерінің құрылысы басталады. Тек Үштерек ауылындағы спорт залында әрлеу жұмыстары және дене шынықтыру-сауықтыру кешенінде шағын сәулеттік пішіндерді орнату жұмыстары қалды. Қаратеректе тағы бір кешенде арка, линтель, терезе мен есік орындары орнатылуда – барлығы 70 пайызға орындалды.

Жоспар бойынша биыл сәуір айында Ертіс және Успен аудандарындаь және Май ауданында бір айдан кейін бассейндер құрылысы басталады. Май ауданының әкімі Қадылжан Сәтиев түсіндіргендей, Көктөбе ауылындағы нысан техникалық және авторлық қадағалаудан өткен. Мердігерге наурыз айының басында аванс төленді, алдағы күндері жұмыс кестесі жасалады. Мердігер арнайы техника әкеліп, инфрақұрылымды орнатуға кіріседі. Жоба – екіжылдық, биылғы жылға жоспарланған соманың жартысы – 250 миллион теңге.

– Сіз құрылыс бөлімін басқардыңыз және осы істің маманы болғандықтан бұл үлкен құрылыс жобасы емес екендігін түсінесіз. Жобаны екі жылға созбай, осы жылы аяқтау мүмкіндігін қарастырыңыз. Қаржыны табамыз, – деді Асайын Байханов.

Бассейннің жалпы ауданы 700 шаршы метрден асады, яғни бір уақытта 24 адам жүзе алады. Бассейнде әрқайсысының ені 1,8 метр болатын төрт жолақ болады.