Жөндеу құны бір миллиард теңгеден асады, деп хабарлайды @Pavlodarnews.kz тілшісі.

Павлодар жылу электр орталығы-2-де 2025–2026 жылғы жылыту маусымына дайындық аясында №1 қазан агрегатына кеңейтілген ағымдағы жөндеу жүргізіліп жатыр. Бұл — маусым алдындағы негізгі кезеңдердің бірі.

Жөндеу аясында жылу беру беттері мен ауа қыздырғыштардың кубтары (ВЗП) ауыстырылып жатыр. Жұмысқа 100-ден астам мердігер маман тартылған. Жөндеу құны 1 миллиард теңгеден асады.

Қазіргі уақытта жұмыстардың 50%-дан астамы орындалды. Жөндеуді аяқтау мерзімі – 2025 жылдың 27 тамызы.

– Бұл – жай ғана жоспарлы жөндеу емес. Бұл – жабдықтың ресурс мүмкіндігін қалпына келтіруге бағытталған кешенді жұмыс. Бұл қазанның сенімділігі – павлодарлықтардың үйлеріне жылу мен жарықтың үздіксіз берілуінің кепілі, – деді ЖЭО-2 директорының міндетін атқарушы Роман Паустьянов.

Станцияда түрлі деңгейдегі жөндеу түрлері қолданылады: ағымдағы, кеңейтілген ағымдағы және күрделі жөндеу. Кеңейтілген ағымдағы жөндеу қондырғының қызмет ету мерзімін ұзартуға және қысқы жүктемелерге төтеп беру қабілетін арттыруға бағытталған.