Заң бұзушылар тұрғын үйге заңсыз кіріп, тұрғынның алтын бұйымдарын тартып алған, деп хабарлайды @Pavlodarnews.kz тілшісі.

ҚР Ішкі істер министрлігі баспасөз қызметінің мәліметінше, бес күдікті уақытша ұстау изоляторында қамауда. Ауыр қылмыс жасағаны үшін мүлкі тәркіленіп, жеті жылдан он екі жылға дейін бас бостандығынан айыру қаупі төніп тұр. Олар – қылмыстық-діни тұлғалар және басқа аймақтардың тұрғындары.

– Бір мезгілде Екібастұз қаласында және Павлодардың өзінде павлодарлық әріптестермен бірге төрт адамды ұстадық. Бесінші сыбайласы елордада ұсталды. Тұрғын үйге заңсыз кіру арқылы жасалған қарақшылық шабуыл фактісі бойынша сотқа дейінгі тергеп-тексеру басталды. Қазіргі таңда барлық қажетті тергеу әрекеттері жүргізіліп жатыр, – деп атап өтті Қостанай облысы полиция департаменті бастығының орынбасары Нығмет Исмағұлов.

Қаңтар айының басында Қарасу ауылында медициналық бетперде киген белгісіз тұлғалар жергілікті тұрғынның үйіне кіріп, зорлық-зомбылық көрсетіп, оған дене жарақаттарын салды. Одан жалпы сомасы 650 мың теңге тұратын алтын бұйымдарын тартып алған. Ұсталғандардың басқа да осыған ұқсас қылмыстарға қатысы бар-жоғы тексеріліп жатыр.