Белгілі ақын, қазақ әдебиетінің көрнекті тұлғасы Иса Байзақовтың 125 жылдығына орай шара Ертіс ауданы Үлгілі ауылындағы Иса Байзақов атындағы орта мектепте ұйымдастырылды, деп хабарлайды @Pavlodarnews.kz тілшісі.

Байқауға облыстың барлық өңірлерінен келген 50 оқушы қатысып, ақын шығармашылығына деген сүйіспеншілігін, өнер мен білімге деген құштарлығын көрсетті.

Іс-шара ақынның рухына тағзым ету рәсімімен басталып, қатысушылар Иса Байзақовтың ескерткішіне гүл шоқтарын қойды. Шараның құрметті қонағы – ақынның немере туысы, ҚР білім беру ісінің үздігі, мектеп мұражайының негізін қалаушы Күләш Әбиқызы шашу шашып, жас қатысушыларға сәттілік тіледі.

Байқаудың басты мақсаты – ұлы ақынның шығармашылық мұрасын насихаттау, жас буынды рухани құндылықтарды қастерлеуге баулу және олардың көркемдік қабілетін дамыту.

«Иса оқулары» төрт бағытта ұйымдастырылды. «Еркін күшпен өрлеймін, өмірім ұзақ – өлмеймін…» бағыты бойынша Қарақұдық орта мектебінің оқушысы Данэль Жасқайрат үздік атанды. «Ән қанатында» номинациясында № 3 Ертіс мектебінің 5-сынып оқушысы Мария Хунтузиди бірінші орынды иеленді. «Бұл жырды мен жырламай, кім жырлайды?» шығармашылық бағыты мен сахналық қойылымдар бойынша № 4 Ертіс мектебінің 9-сынып оқушысы Кәусар Бахытжан және Железин ауданы Екішоқ мектебінің 8-сынып оқушылары Ильяс Мұқатаев пен Айнара Вахит жеңімпаз болды. «Жас исатанушылар» ғылыми жоба қорғау бөлімінде № 2 Ертіс мектебінің 7-сынып оқушысы Ерасыл Арысан бірінші орынға ие болды.

Барлық жеңімпаздар Павлодар облысы білім басқармасының құрмет грамоталарымен және сыйлықтарымен марапатталды.

– Бұл байқау – жас буынның бойында отансүйгіштік сезім мен өнерге, әдебиетке құрметті қалыптастырудың тамаша мүмкіндігі. Иса Байзақовтың мұрасын насихаттау арқылы біз оқушылардың ұлттық рухани дүниетанымын тереңдетеміз, – деді Ертіс ауданының білім бөлімінің әдіскері Нұргүл Сұлтанова.

Шара соңында қатысушылар мен ұстаздар Иса Байзақовтың өмірі мен шығармашылығына арналған мектеп мұражайын аралап, ақын мұрасына құрмет білдірді.