Железин ауданында медицина қызметкері банк қосымшалары арқылы заңсыз операциялар жасаған, деп хабарлайды @Pavlodarnews.kz тілшісі.

Аудандық сот фельдшерге қатысты ұрлық, ақпараттық жүйеге заңсыз қол жеткізу және алаяқтық жасауға оқталу фактілері бойынша қылмыстық істі қарады.

– Сотта анықталғандай, 2025 жылдың желтоқсан айында сотталушы қызмет бабын пайдаланып, пациенттердің ұялы телефондары мен банк қосымшаларына бірнеше рет заңсыз кірген. Көмек көрсету сылтауымен олардың құпия сөздерін біліп алып, заңсыз қаржылық операциялар жасаған, – делінген хабарламада.

Ведомствода атап өткендей, бір жағдайда ол пациенттің шотынан бөгде есепшотқа 50 мың теңге аударған. Сондай-ақ басқа эпизодтарда азаматтардың атына несие рәсімдеуге әрекет жасап, банк карталарының деректерін үшінші тұлғаларға беру арқылы ақша жымқырған.

Жалпы келтірілген залал 300 мың теңгеден асқан.

Сот барысында айыпталушы кінәсін толық мойындап, келтірілген шығынды өтеген. Жеңілдететін мән-жайлар ретінде оның өкінуі, жас балаларының болуы және залалды өтеуі ескерілді.

Сот үкімімен ол кінәлі деп танылып, пробациялық бақылаумен үш жылға бас бостандығын шектеу жазасына кесілді. 

Үкім заңды күшіне енді.