Дейтұрғанмен, балалар қатысқан апаттар көбейген, деп хабарлайды @Pavlodarnews.kz тілшісі.

Павлодар облысында 2026 жылдың алғашқы жеті айында жол-көлік оқиғаларының жалпы саны азайған. Бұл туралы облыстық құқықтық статистика және арнайы есепке алу департаментінің өкілдері айтты. Жыл басынан бері өңірде 585 жол-көлік оқиғасы тіркелген. Былтыр осы кезеңде 609 жол-көлік оқиғасы болған. Осылайша, апат саны 24 жағдайға немесе шамамен төрт процентке төмендеген.

Алайда балалардың қатысуымен болған жол-көлік оқиғалары бойынша жағдай керісінше. Департамент өкілі Гүлнұр Түсіпова айтқандай, жеті айда кәмелетке толмағандар қатысқан 187 жол-көлік оқиғасы тіркелген. Былтыр бұл көрсеткіш 161 жағдай болған. Яғни, бір жыл ішінде мұндай апаттар саны 26 жағдайға өскен.

Оқиғалар салдарынан 225 бала дене жарақатын алған. Былтыр жарақат алған балалар саны 204 болған. Ең алаңдатарлығы — биыл жол-көлік оқиғаларынан алты кәмелетке толмаған бала қаза тапқан. Өткен жылдың сәйкес кезеңінде үш бала көз жұмған. Қаза болғандардың үшеуі көлік жолаушысы, үшеуі жаяу жүргінші болған. Балалардың жасы 6-дан 17 жасқа дейін.

Алты қайғылы жағдайдың төртеуі Павлодар мен Ақсу қалаларында, екеуі облыстық және республикалық маңызы бар автомобиль жолдарында болған. Сонымен қатар, алты өлімнің төртеуі жазғы кезеңге тиесілі.

Мамандардың айтуынша, балалардың жолдағы қауіпсіздігіне қатысты профилактикалық жұмысты күшейту қажет. Бұл бағытта ата-аналар, мектептер, жүргізушілер, жол қызметтері мен жергілікті атқарушы органдардың бірлескен жұмысы маңызды.

Құқық қорғау органдарының өкілдері әрбір ауыр жол-көлік оқиғасының себептері мен мән-жайы жеке зерттелетінін атап өтті. Алдағы оқу жылына байланысты балалардың қауіпсіздігін қамтамасыз етуге бағытталған қосымша профилактикалық шаралар әзірленіп жатыр.