Екі ауылда алғашқы медициналық-санитарлық көмек көрсетуге қажетті барлық құрал-жабдықтармен жабдықталған жаңа медициналық пункттер ашылды, деп хабарлайды @Pavlodarnews.kz тілшісі.

22 тамызда Екібастұздың ауылдық аймағында алғашқы медициналық-санитарлық көмек көрсететін екі жаңа нысан – Байет ауылындағы фельдшерлік-акушерлік пункт және Академик Әлкей Марғұлан атындағы ауылдағы медициналық пункт ашылды.

Байет ауылындағы заманауи фельдшерлік-акушерлік пункт 822 тұрғынға, оның ішінде 231 балаға қызмет көрсетуге арналған. Бұған дейін медициналық көмек көрсету қолайсыз жағдайда жүзеге асырылып келген. Сондықтан арнайы медициналық ғимараттың пайда болуы ауылдағы денсаулық сақтау инфрақұрылымын дамытудағы маңызды қадам болды.

Жаңа ФАП алғашқы медициналық-санитарлық көмек көрсетуге қажетті барлық құрал-жабдықтармен жабдықталған. Мұнда фельдшер қабылдайтын кабинет, процедуралық және екпе кабинеттері, арнайы акушерлік кабинет, сондай-ақ биоматериал жинауға арналған жеке бөлме қарастырылған.

Ауыл тұрғындары жоспарлы және профилактикалық тексерулерден өтіп, бастапқы диагностика, вакцинация және шұғыл медициналық-санитарлық көмек ала алады. ФАП-та инъекция және тамырға дәрі жіберу сияқты қажетті медициналық процедуралар да жасалады.

Ғимарат орталық су құбыры жүйесіне қосылған және автономды электр жылыту жүйесімен жабдықталған. Жобалау кезінде қозғалысы шектеулі азаматтардың медициналық нысанға қолжетімділігіне де ерекше көңіл бөлінген. Кіреберіс бөлік пандуспен жабдықталып, келушілердің еркін қозғалуына ыңғайлы болу үшін есік ойықтары кеңейтілген.

Байет ауылындағы ФАП құрылысы «Ауылдық денсаулық сақтауды жаңғырту» ұлттық жобасы аясында жүзеге асырылды.

– Біздің басты міндетіміз – алғашқы медициналық көмекті жылдам, сапалы әрі қолжетімді етіп, оны тұрғындардың үйіне барынша жақындату. Бұл нысанның ашылуымен ауыл тұрғындары негізгі ем немесе кеңес алу үшін ондаған шақырым жүріп, қалаға қатынауға мәжбүр болмайды. Ғимаратта келушілерге де, медицина қызметкерлерінің күнделікті жұмысына да бірдей ыңғайлы әрі қауіпсіз орта қалыптастырылды, – деді «Персоналды медицина орталығы» ЖШС бас дәрігері Тоғжан Қабылтаева.

Денсаулық сақтау саласындағы тағы бір жаңа нысан Академик Әлкей Марғұлан атындағы ауылда ашылды. Медициналық пункт шамамен 351 тұрғынға, оның ішінде 113 балаға қызмет көрсетеді.

Жаңа ғимарат салынғанға дейін медициналық ұйым бейімделмеген ғимаратта орналасқан. Енді ауыл тұрғындары заманауи құрылыс және санитарлық талаптарға сәйкес келетін медициналық нысанды пайдалана алады.

Медициналық пунктте процедуралық және екпе кабинеттері қарастырылған. Мұнда инъекция жасау, талдау алу және вакцинация жүргізіледі. Сонымен қатар, науқастарды алғашқы тексеруге және шұғыл көмек көрсетуге арналған мейіргер қабылдау кабинеті жабдықталған.

Жаңа нысанның тағы бір артықшылығы – дәріхана пунктінің болуы. Енді ауыл тұрғындары қажетті дәрі-дәрмектерді сатып алу үшін қалаға бармайды.

Байет ауылындағы ФАП сияқты, бұл медициналық пункт те орталықтандырылған су жүйесіне қосылған және автономды электр жылыту жүйесімен жабдықталған. Қозғалысы шектеулі азаматтар үшін пандустар мен кеңейтілген есік қарастырылған.

– Енді адамдарға негізгі процедуралардан өту немесе дәрігердің кеңесін алу үшін ондаған шақырым жердегі қалалық емханаға барудың қажеті жоқ. Біз пациенттерге де, медицина қызметкерлеріне де барынша қолайлы жағдай жасадық, – деп атап өтті Тоғжан Қабылтаева.

Академик Әлкей Марғұлан атындағы ауылдағы медициналық пункттің құрылысы облысты дамытудың өңірлік бағдарламасы аясында жүргізілді.

Екі медициналық нысанның ашылуы өңірдегі денсаулық сақтау инфрақұрылымын жаңарту жұмыстарының кезекті кезеңі болды. 2025-2026 жылдары мұнда алғашқы медициналық-санитарлық көмек көрсететін бірнеше жаңа нысан бой көтерді.

Бұған дейін «Ауылдық денсаулық сақтауды жаңғырту» ұлттық жобасы аясында Құрылысшы ауылында медициналық пункт жұмысын бастаған болатын. 

Осылайша, бірден бірнеше ауылдық елді мекеннің тұрғындары негізгі медициналық қызметтерді тікелей тұрғылықты жері бойынша алу мүмкіндігіне ие болды.