Өңірде Жедел басқару орталығының камералары жол қозғалысы ережелерін бұзу деректерін күн сайын тіркеп отыр, деп хабарлайды @Pavlodarnews.kz тілшісі.

Облыстық полиция департаментінің мәліметінше, кезекті құқық бұзушылықтардың бірі Павлодар қаласы, Майра көшесінде анықталған. Патрульдік полиция «Mazda» маркалы автокөлікті тоқтатып, жүргізушінің көлікті басқару кезінде қауіпсіздік белдігін тақпағанын байқаған. Жүргізуші белдікті тағуды ұмытып кеткенін айтқан.

Сондай-ақ Н. Назарбаев даңғылында полицейлер «Toyota» автокөлігін тоқтатқан. Көліктің артқы орындығында отырған бала арнайы балаларға арналған орындықсыз отырғаны анықталған. Аталған фактілер бойынша жүргізушілерге қатысты әкімшілік хаттамалар толтырылды.

Полиция қызметкерлері жол-көлік оқиғасы немесе күрт маневр кезінде бала көлік ішінде отырып-ақ жарақат алуы мүмкін екенін ескертеді.

Жыл басынан бері жолаушыларды тасымалдау талаптарын және қауіпсіздік белдігін пайдалану ережелерін бұзғаны үшін 1564 жүргізуші әкімшілік жауапкершілікке тартылған.

Тәртіп сақшылары қауіпсіздік белдігін тағу – тек заң талабы ғана емес, жүргізуші мен жолаушылардың өмірі мен денсаулығын қорғаудың маңызды шарты екенін атап өтті.