Іс-шараға 50 жылдан астам уақыт бойы білім саласында жұмыс істеген қызметкерлер де қатысты, деп хабарлайды @Pavlodarnews.kz тілшісі.

Павлодар облысында білім беру саласындағы жұмысшы мамандарды марапаттау рәсімі өтті. Бұл шараны облыстық білім беру басқармасы мен «Қазақстандық білім, ғылым және жоғары білім қызметкерлері салалық кәсіптік одағының Павлодар облыстық ұйымы» қоғамдық бірлестігі ұйымдастырды.

Кәсіподақтың 100 жылдығына орай білім беру саласында 15 жылдан астам еңбек еткен 100 кәсіподақ мүшесі — еңбек мамандықтарының өкілдері шақырылды. Іс-шараға 50 жылдан астам уақыт бойы білім саласында жұмыс істеген қызметкерлер де қатысты.

Аталмыш шараға облыстық білім беру басқармасының басшысы Самал Айтқазина қатысып, мерекенің маңыздылығын атап өтті.

– Білім саласының дамуына үлкен үлес қосып келе жатқан әріптестерімізге шын жүректен алғыс айту үшін жиналып отырмыз. Жұмысшы мамандықтары – бұл біздің экономиканың және еліміздің болашағы. Біз жастарды осы мамандықтарға баулып, олармен мақтануы үшін барлық жағдайды жасауымыз керек, – деп атап өтті басқарма басшысы Самал Айтқазина.

Шараға қатысушылар жұмысшы мамандықтарының абыройын арттыру және жастарды техникалық және кәсіптік мамандықтарға тарту үшін тамаша мүмкіндік болғанын атап өтті.

– Биыл елімізде Жұмысшы мамандықтары жылы деп жарияланды. Бұл шара –  әрқайсыңыздың еңбегіңізге деген кішкене, бірақ шынайы алғысымыздың белгісі. Сіздер өз ісіңізге деген адалдық, еңбекқорлық пен жауапкершілік арқылы білім саласына үлкен өзгерістер әкеліп отырсыздар. Сіздерге және сіздер сияқты басқа да мамандарға барша қоғам атынан алғысымды білдіремін, –  деді қоғамдық бірлестік төрағасы Гүлбарам Науразбаева.

Кеш барысында білім беру басқармасы мен кәсіподақ ұйымдары бірлесіп, еңбегімен елге үлгі болып жүрген қызметкерлерге дипломдар табыстап, құрмет көрсетті. Сонымен қатар, облыстық білім беру басқармасы мен кәсіподақ ұйымы қызметкерлерге «Энергетик» санаторий-профилакторийіне жолдамалар тарту етті.