Облыстық байқаудың ұйымдастырушысы облыстың білім  беру басқармасының білім беруді дамытудың инновациялық орталығы болып табылады, деп хабарлайды @Pavlodarnews.kz тілшісі.

«Ұстаздар аламаны - 2023» жас педагогтер арасындағы зияткерлік байқауы  облыстық турының қорытындысы бойынша Павлодар қаласы М. Әлімбаев атындағы мектептің физика пәні мұғалімі Ахылбек Нұрсұлтан I орын алды және облыстың білім беру басқармасының I дәрежелі дипломымен марапатталды. 

— Бүгінгі байқау қызықты әрі танымды өтті. Мен өзім физика пәнінің мұғалімі болсам да, өзімнің эрудициямды тексеріп, өз халқымның тарихы, әдебиеті, салт-дәстүрлері туралы білімімді кеңейттім. Облыстық турға қатысушылар жақсы дайындалып, елеулі бәсекелестік танытты. Мұндай іс-шаралар көп болсын, — дейді Ахылбек Нұрсұлтан.

Байқау жеңімпазы облыстық команда құрамында байқаудың республикалық турына қатысады. Байқаудың қалалық турының гран-при иегері, «Жаңа мектеп - заманауи мұғалім - 2023» республикалық байқауы қалалық кезеңінің «Шеберлік шыңдарына» номинациясының жеңімпазы.

— Зияткерлік байқауларға қатысу жас педагогтердің кәсіби және жеке өсуіне ықпал етеді. Олардың шығармашылығы мен бәсекеге қабілеттілігін заманауи білім беру кеңістігінде дамытады, — деп атап өтті Павлодар қаласы білім беру бөлімі әдістемелік кабинет меңгерушісінің міндетін атқарушы,  «ПроЛС» қалалық клубының басшысы Шолпан Нұрахметова.

Байқаудың ережесі бойынша қатысушылар еркін форматта өзін-өзі таныстырды, тарихты, әдебиетті, белгілі тұлғалардың өмірбаянын тереңдете отырып және педагогикалық жағдайларды шешуде елтану викторинасына қатысты.