Өңірде пайдаланылмай жатқан саяжай учаскелерінің саны көп, деп хабарлайды @Pavlodarnews.kz тілшісі. 

Ардагерлер бұл жерлерді қайта айналымға енгізіп, тиімді пайдаланудың жолдарын қарастыру қажет деп санайды.

Бұл мәселе Павлодар облыстық ардагерлер кеңесі жанындағы сараптамалық кеңестің отырысында көтерілді. Кеңес мүшесі, мемлекеттік қызмет және ауыл шаруашылығы саласының ардагері Владимир Левченконың айтуынша, Павлодар қаласында 44,4 мың саяжай учаскесі бар. Оның шамамен 22 мыңы бүгінде пайдаланылмайды.

Облыс бойынша жағдай да осыған ұқсас. Өңірде жалпы 51,5 мың саяжай учаскесі тіркелген. Оның 26 мыңға жуығы ғана қолданыста болса, 25 мыңға жуық учаске қараусыз қалған.

Сарапшы әсіресе әуежай мен Успенка бағытына қарай орналасқан саяжай алқаптарындағы жағдайға алаңдаушылық білдірді. 

– Күтімсіз қалған үйлер мен жер телімдерін арамшөп басып кеткен. Мұндай аумақтарда жеміс ағаштары өсіп тұрғанымен, олардың өнімі пайдаланылмайды. Сонымен қатар, қараусыз қалған жерлер жаз мезгілінде өрт қаупін арттырады, – дейді ол. 

Облыстық жер қатынастары басқармасы басшысының орынбасары Кенжегүл Жолжақсынованың айтуынша, саяжай учаскелерінің едәуір бөлігі жеке меншікке тиесілі. 

– Егер меншік иесі өз жерін пайдаланбай, тастап кеткен болса, жергілікті атқарушы органдар оны иесіз мүлік ретінде есепке қоюы керек. Заңда белгіленген мерзім аяқталғаннан кейін бұл мәселе сот арқылы шешіледі. Сот учаскені иесіз деп таныған жағдайда, жер коммуналдық меншікке өтіп, кейін оны басқа азаматтарға беру мүмкіндігі пайда болады. Бұл бағыттағы жұмыс қалалар мен аудандарда жүргізіліп жатқанымен, оның қарқыны әзірге жеткіліксіз, – деді ол. 

Сонымен қатар, жаңа саяжай жерлерін бөлу жұмыстары жалғасып жатыр. Соңғы үш жылда облыстың үш қаласы мен бір ауданында бау-бақша өсіруге арналған 530-дан астам жер учаскесі азаматтарға берілген.

Ардагерлердің пікірінше, жаңа жер телімдерін бөлумен қатар, бұрыннан бар, бірақ пайдаланылмай жатқан учаскелердің мәселесін де шешу қажет. 

– Бұл тақырып бұған дейін де қоғамдық тыңдауларда көтерілсе де, айтылған ұсыныстардың барлығы бірдей нақты іске ұласады. Менің ойымша, қараусыз қалған саяжайларға қатысты тұрғындардың шағымдарына жеке-жеке жауап берумен шектелмей, мәселені тұрақты бақылауда ұстайтын жүйелі механизм қажет, – дейді кеңес төрағасы Александр Рюмкин.

Сараптамалық кеңес мүшелері саяжаймен айналысатын зейнеткерлерге жағдай жасауды да ұсынды, себебі қолданыстағы саяжайлардың шамамен жартысын егде жастағы азаматтар пайдаланады.

Зейнеткерлер үшін саяжайдың маңызы ерекше. Мұнда олар картоп, көкөніс, жидек және басқа да ауыл шаруашылығы өнімдерін өсіреді. Сарапшылардың есептеуінше, бір саяжай учаскесінен бір маусымда орта есеппен бір тоннаға дейін өнім алуға болады.

Осыған байланысты ардагерлер зейнеткерлер үшін жер төлемдерін төмендету және саяжай алқаптарына қатынайтын көлік мәселесін шешу жөнінде ұсыныстар айтты. Қазір саяжай иелері жерге қатысты төлемдерден бөлек, жол ақысы, күзет және учаскені күтіп ұстау шығындарын да өздері өтейді.

Ардагерлер саяжайлардың әлеуметтік және экологиялық маңызына да назар аударды. Саяжайларда әртүрлі жастағы отбасы мүшелері бірге еңбек етіп, балалар мен немерелерге еңбекке баулу мүмкіндігі беріледі. Сонымен қатар, саяжай алқаптары қала маңындағы жасыл аумақтарды сақтауға үлес қосады.

Сараптамалық кеңес мүшелері осы мәселелерді ескере отырып, қараусыз қалған саяжайларды қайта айналымға енгізу және оларды тиімді пайдалану бойынша нақты ұсыныстар әзірлеу қажет деп есептейді.

Еске сала кетейік, сараптамалық кеңесте қарт тұрғындардың жеке қосалқы шаруашылықтарын дамытуға жағдай жасау және ауыл маңындағы жайылым тапшылығын шешу мәселесі де талқыланған болатын.