ҚАЖ қызметкерлері иттерге арналған үйшіктер әкелді, деп хабарлайды @Pavlodarnews.kz тілшісі.

Ерікті Елена Болотина  мекеме қызметкерлерінен Ақсу қаласының жануарлар мекемесінде орналасқан иттерге арналған үйшіктер жасауды сұраған. Оның қамқорлығында бүгінде 72 ит пен 34 күшік бар.

–  Олардың кейбіреуін тастап кеткен, кейбіреуін өзіміз алып келдік.  Барлығы күтімді қажет етеді. Біздің баспана мейірімді азаматтардың есебінен жұмыс істейді және біз ҚАЖ қызметкерлеріне өтінішімізге жауап бергендері үшін ризамыз, – дейді Елена Болотина. 

Ведомствода еріктінің өтініші №45 мекемеде жазасын өтеп жатқан сотталғандарға жеткізілгенін айтады. Ол жерде көмектесуге ниет білдірген сотталушылар мекеменің өндірістік аймағында қолда бар материалдардан үйшіктер жасаған.

– Қатты аяз қарсаңында баспанаға көмектесуді ұйғардық. Олар  үшін жазаларын өтеу кезінде өз пайдаларын тигізе алатындығы жандарына жылу береді, – дейді № 45 мекеме бастығының орынбасары Нұрлан Тойғанбаев.

Сотталғандар иттерге арналған екі үйшік жасаған.