Бүгінгі таңда 13 көшедегі жұмыс аяқталды, деп хабарлайды @Pavlodarnews.kz.

Бұл туралы облыс орталығының басшысы Хасар Хабылбеков өзінің Instagram парақшасында жазды. 

- Облыс әкімі Асайын Байханов проблемалы инфрақұрылымдық жобаларды тез арада аяқтауды тапсырған болатын. Сондықтан мен шағын аудандардың тұрғындарымен кездесуді жалғастырудамын. Бұл жолы екінші Павлодарға бардым. Мұнда да маңызды мәселелердің бірі кәріз желісінің құрылысы мен шағын аудандағы жолдардың жағдайы. Бұл жергілікті тұрғындардың көтерген мәселелері, - деп жазды қала әкімі.

Қазіргі таңда 13 көшеде орталықтандырылған кәріз желілерін тартудың үшінші кезеңі аяқталған. Енді  келесі кезекте Архангельская мен Литвинов көшелері тұр. 

- Екінші Павлодарға кәріз жүйесін салу және іске қосу, сонымен қатар абаттандыру жұмыстары соңына дейін жеткізілетін болады, - деді ол.

ТҮКШ бөлімі кәріз желісі салынған көшелерде 15,7 шақырым жолға ұсақ тастар төседі. Тағы 1,7 шақырым жол бойынша жұмыс жүріп жатыр.