Қазіргі таңда қаланың солтүстігіндегі 55 үйге ыстық су берілді, деп хабарлайды @Pavlodarnews.kz тілшісі.

«ПАВЛОДАРЭНЕРГО» АҚ баспасөз қызметінің мәліметінше, сынақтар 2024-2025 жылдар жылыту маусымының тұрақты өтуін қамтамасыз ету мақсатында өткізілді.

– Оңтүстік желілік аудандағы сынақтардың қорытындысы бойынша мамандар 83 ақау анықтады. Оның 14-і магистральдік жылу желілерінде және 69 ақау – орамішілік желілерде. Солтүстік желілік ауданда 5-11 тамыз аралығында жүргізілген гидравликалық сынақтардың қорытындысы бойынша 59 ақау анықталды. Оның ішінде 4 ақау – магистральдік жылу желілерінде және 55 ақау – орамішілік желілерде, – деп атап өтті «Павлодар жылу желілері» ЖШС мамандары.

13 тамыздағы жағдай бойынша кешке 605 үй тексеріліп, желі толтырылуда. Солтүстік желілік ауданның 55 үйіне ыстық су берілді.

– Магистральдік және орамдық жылу желілеріндегі ақауларға байланысты 574 көп қабатты тұрғын үйде ыстық су жоқ, 55 үй желідегі жоспарлы және күрделі жөндеу жұмыстарына, және 11 үй қызмет көрсетуші ұйыммен жүргізіліп жатқан жұмыстарға байланысты ыстық судан ажыратылған, – делінген хабарламада.

Еске сала кетейік, 29 шілде мен 4 тамыз аралығында «Павлодар жылу желілері» ЖШС «Қазақстан алюминийі» АҚ филиалының электр станциясынан жылу желілерін гидравликалық сынақтан өткізді. Тестілеуге байланысты осы кезеңде қаланың оңтүстік тұрғын үйлерде ыстық су берілмеді. 5-11 тамыз аралығында ұқсас жұмыстар қаланың солтүстік бөлігінде жүргізілді. Сынақтар аяқталғаннан кейін мамандар бір ай ішінде тұрғын үйлерге ыстық суды кезең-кезеңімен қосу жұмыстарын жүргізетінін айтып өткен болатын.