Бүгінгі таңда қойылған кестеден үш мектептің жөндеу жұмыстары кешігуде, деп хабарлайды @Pavlodarnews.kz тілшісі.

Бұл жайлы Павлодар облысы әкімдігінің аппараттық жиналысында облыстық білім басқармасының басшысы Самал Айтқазина мәлімдеді.

– Алғашқы күрделі жұмыстары басталған күннен бастап арнайы кесте құрылды. Әрбір мектептің жанында ата-аналардан құралған жеке қоғамдық бақылау жасақталған болатын. Сол ата-аналармен бірлесіп бүгінгі күнде қадағалап жатырмыз, – дейді Самал Айтқазина.

Сондай-ақ, білім басқармасының басшысы үш мектептің кестеден қалып келе жатқанын мәлімдеді. Бұл мектептер – Шарбақты ауданындағы Жаңа ауыл, Хмельницкое ауылдарындағы мектептер және Павлолар қаласындағы №5 мектеп. Облыс әкімі Асайын Байханов демалыс күндері кестеден қалып келе жатқан мектептерді аралап, бақылап шығуды жүктеді.

Сонымен қатар, аппараттық жиналыста салынып жатқан мектептер жайлы сөз қозғалды.

– Моисеевка, Сычевка, Қаражар ауылдарында жаңа мектептер салынуда. Моисеевка мен Қаражарда бүгінгі күні құрылыстың екінші қабаты аяқталып жатса, Сычевка метебінде бірінші қабатыда көтерілмеген, – дейді Павлодар облысының әкімі Асайын Байханов.

Бұл сауалға Павлодар ауданының әкімі Николай Дычко ауданындағы салынып жатқан мектептің кешіктіріліп жатқанын мердігерден көрді.

– Бүгінгі таңда бұл метептің салынуына керек барлық құрал-жабдық бар, жұмысшылар да толық. Жақын уақытта құрылыс мерзімін үлкейтпекпіз, – дейді Николай Дычко.

Облыс әкімі Сычевка мектебінің мердігері мен Павлодар ауданының әкімін облыс орталығына шақырып, бұл мәселені қарастыруды ұсынды.