Полиция өңір тұрғындарынан күн сайын ұялы телефондарын жоғалтқаны туралы арыз қабылдайды, деп хабарлайды @Pavlodarnews.kz тілшісі.

Облыстық полиция департаментінің баспасөз қызметінің мәлімдеуінше, облыс орталығындағы монша кешендерінің бірінде Iphone 14 маркалы телефонын ұрлатып алған қыз хабарласқан. 

-Тағы бір жағдайда,  сұғанақ қолдар павлодарлықтың Samsung Galaxy маркалы телефонын  бутиктердің бірінде ұрлаған. Осындай ұрлық Лермонтов көшесіндегі дүкенде қайталанса, әккі ұрылар Huawei маркалы телефонды ашық тұрған сөмкеден қолды еткен, - делінген хабарламада.  

Қазіргі уақытта барлық фактілер бойынша осы қылмыстарға қатысы бар адамдарды анықтауға бағытталған жедел-іздестіру іс-шаралары жүргізілуде.

Полицейлер тұрғындарға қоғамдық орындарда және қоғамдық көліктерде, сондай-ақ адамдар көп жиналатын жерлерде өз заттарын бақылауға кеңес береді. 

Айта кетейік, ағымдағы жылдың басынан бері жедел уәкілдердің күшімен 60 –тан астам гаджет иелеріне қайтарылды.