Кеш барысында арнайы көрме ұйымдастырылмақ, деп хабарлайды @Pavlodarnews.kz тілшісі.

5 шілде  күні Бұқар жырау атындағы әдебиет және өнер музейінде Ұлттық домбыра күніне арналған  «Қасиетті домбыра» атты ән-күй, рухани-әдеби іс-шара ұйымдастырылады. 

–   Жыл сайын шілденің алғашқы жексенбісіне дөп келетін, ұлттық аспабымызды ұлықтауға арналған бұл мереке 2018 жылдан бері елімізде кеңінен аталып өтуде. Ұлттық домбыра күнінің белгіленуі де – халқымыздың домбыраға деген құрметінің бір көрінісі, –  дейді музейде. 

Іс-шара барысында арнайы көрме ұйымдастырылып, қазақтың ұлттық аспаптары, атап айтқанда, әйгілі жерлестеріміз Мұзафар Әлімбаев, Кәукен Кенжетаев, Рахметхан Нұрбасаров, Мейрам Асылғазин, Нұтфолла Шәкенов, Зекебай Солтанбайұлының жеке домбыралары қойылады.

Сондай-ақ, кеште өңірімізге белгілі әнші-күйшілердің орындауында қазақтың танымал әндері шырқалып, күйлер шертіледі.