Чикаго қаласында мыңдаған қатысушы мен жанкүйерлердің ортасында спортшы туған қаласының елтаңбасы бейнеленген жалауды ұстап жүгірді, деп хабарлайды @Pavlodarnews.kz тілшісі.

Жер бетіндегі ең ірі марафондардың бірі – Bank of America Chicago Marathon жарысына жүзге жуық қазақстандық қатысты. Солардың бірі – Гавай аралдарында өткен Ironman әлем чемпионатының қатысушысы, әуесқой спортшы Әділ Сыздықов. Ол бұл жолы мәреге жетуді ғана емес, туған жерін танытуды мақсат етті.

– Әсерлерім ұмытылмас. Әсіресе, қытай стиліндегі Чайнатаун қақпасынан өткен сәт ерекше есте қалды. Барабандар, айдаһарлар, әр қадамда бізге қолдау білдірген чикаголықтар. Жарыс жолында павлодарлықтар да болды, бұл жанға ерекше жылылық сыйлады, – дейді Әділ.

Бұл марафон оның төрт major марафонының ішіндегі ең баяуы болды, нәтижесі – үш сағат 24 минут. Ең жылдам көрсеткіш Бостон марафонында тіркелген, дегенмен ол ең күрделі трассалардың бірі саналады.

– Қарды таптау мен үшін жазғы асфальтта жүгіргеннен тиімдірек сияқты, сірә. Берлин марафонының жолы тегіс болса да, оңай болмады. Ал Лондон Бостоннан кейінгі жылдам марафон болды, – деп әзілдеді спортшы.

Chicago Marathon – бұл жай ғана 42,195 км қашықтық емес, нағыз қалалық шоу. Чикаго көшелері нағыз спорт алаңына айналады. Жүгірушілер өз күшін сынаса, көрермендер мерекелік атмосфераны қалыптастырады.

World Marathon Majors сериясы әлемдегі ең беделді алты марафонды біріктіреді: Бостон, Лондон, Берлин, Чикаго, Нью-Йорк және Токио. Өткен жылы бұл қатарға ресми түрде Сидней марафоны қосылды, ол оңтүстік жарты шардағы алғашқы major және ең жартасты трасса. Бұл жарыстарға қатысу үшін лотерея, іріктеу немесе қайырымдылық бағдарламалары арқылы өтуге болады.

Әділ үшін әр марафон қарапайым спорттық сынақ емес, бұл – Павлодар туралы әлемге айту мүмкіндігі.