Шомылу маусымы ресми түрде жабық деп жарияланды, сондықтан суға түсуге рұқсат жоқ, деп хабарлайды @Pavlodarnews.kz.

Павлодар облысы ТЖД азаматтық қорғаныс басқармасының офицері Темірлан Жапалбайдың сөзінше, күз мезгілінің басталуымен су айдындарына баратын және жүзу құралдарын пайдаланатын балықшылар мен аңшылардың саны жыл сайын артып келеді. 

– Жылдың бұл уақытында суға бату және суда жазатайым оқиғалардың  орын алу қаупі жоғарылайды. 31 тамызда шомылу маусымы аяқталды. Жағалауда жабдықтар алынып тасталды. Яғни, бүгінде шомылуға рұқсат етілген орындар жоқ, – деді Темірлан Жапалбай. – Егер адамдар орталық жағажайда суға кіріп шомылса, бұл қауіпсіздік ережелерін бұзу деп саналады. 

Аталмыш бұзушылық үшін жауапкершілік қарастырылады. Ережені бұзған тұрғын ұсталса, ҚР ӘҚБтК-ның 412-бабы бойынша – 7 АЕК, атап айтқанда, 25 844 теңге айыппұл төлейді. 

– Бізде шомылу маусымы кезеңдегідей күзгі маусымда да профилактикалық іс-шаралар, соның ішінде рейдтер жалғасады. Суға түсу фактілері анықталған кезде азаматтарға әкімшілік хаттама толтырылады, – деп атап өттті Темірлан Жапалбай.

Еске сала кетейік, биыл суда көз жұмғандардың саны екі есе артқан. Шомылу маусымында 11 адам суға батты.