Мықты қауымдастықтың арқасында жас ұрпақ ана тілін меңгеріп, домбыра тартып үйренуде, деп хабарлайды @Pavlodarnews.kz тілшісі.

Павлодарлық Гаухар Сембаева Хьюстон қаласында 15 жыл тұрады. Ол жерлестерімен бірге Texas Qazaq Foundation қорының жұмысына қатысады. Қордың негізгі бағыты – мәдени мұраны сақтау, жергілікті қауымдастықтарды нығайту және Техастағы қазақстандық жастарды қолдау. Ұйымның миссиясы – қазақ диаспорасын дамыту, америкалық қоғамға бейімделуге көмектесу, білім алу, көшбасшылық және экономикалық өсім үшін мүмкіндіктер жасау. Сонымен қатар қатысушылар мәдениеттер арасындағы берік байланыс орнатып, тарихи отанмен байланысты сақтауға ұмтылады.

Гаухардың айтуынша, Хьюстонда АҚШ-тағы алғашқы қазақ жексенбілік мектептерінің бірі он жылдан астам уақыттан бері жұмыс істеп келеді. Бұл мектепке кезінде оның балалары да барған.

– Балалар жарты күнін сабақта өткізеді: қазақ тілін үйренеді, домбыра тартады, ұлттық билермен айналысады. Қосымша шахмат, LEGO және STEM бағыттары бар. Қазір мектепте әртүрлі жастағы 70-тен астам оқушы бар, олар «Балапан» және «Тұлпар» топтарына бөлінген, – дейді Гаухар.

Оның айтуынша, бұл мектеп балалардың тәрбиесінде маңызды рөл атқарып, олардың тамырынан ажырамай, өз болмысын түсінуіне көмектескен.

– Балаларым Қазақстанға қатыстының бәрін жақсы көреді. Мұнда, туған жерден жырақта жүрсе де, олардың өз ортасы қалыптасты – оларды тіл, дәстүр және ортақ рух біріктіреді. Бұл мен үшін өте құнды. Қай жерде жүрсе де, олар өз тамырын ұмытпай, кім екенін, қайдан шыққанын түсінсе деймін. Дәстүрлер олар үшін жай сөз емес, өмірінің бір бөлігі, жүрекке жылы, әрдайым бірге жүретін құндылық болса екен, – дейді павлодарлық.

Домбыра үйірмесіне қызығушылық жоғары. Оны дамытуға АҚШ-та тұратын қазақстандық студенттер, еріктілер мен музыканттар көмектеседі.

– Біз бұл бағытты одан әрі дамытқымыз келді. Бізбен Орал қаласынан Асқар есімді домбырашы байланысқа шықты, ол – кәсіби музыкант. Бізді Бостонда тұратын Екібастұзда туған қыз таныстырды. Бұл пандемия кезінде болды, бірақ біз тоқтаған жоқпыз. Балалар онлайн форматта оқыса да, ұлттық аспапқа деген қызығушылық тыйылмады. Бір қызығы, ұстаз ағылшын тілін, ал балалар қазақ тілін толық білмесе де, бір-бірін түсінді. Содан бері сабақтар жалғасып келеді. Біз алғашқы домбырашылар ансамблін құрдық, онда менің ұлым да ойнады. Қазір олар мектепті тәмамдады, – дейді Гаухар.

Бүгінде мектеп жанындағы үйірме белсенді түрде дамып келеді. Домбыра қазақ мәдениетіне деген сүйіспеншілікті дала әуені, ерекше үн мен көңіл күй арқылы ерекше жеткізеді. Бұл әуендерден туған жерге деген сағыныш пен шынайы сезім сезіледі.

Хьюстонның мұнайлы өңір екені де белгілі. Бір қызығы, осы аймаққа Қазақстанның мұнайлы өлкесі, Батыс Қазақстаннан келгендер көп. Олар осында еңбек етіп, білім алып, сонымен қатар өз мәдениетін дамытуға үлес қосып жүр. Қазақстандықтар бірге Наурыз мерекесі, Көрісу, Тәуелсіздік, Абай күндерін атап өтіп, ұлттық ойындар мен мәдени шаралар ұйымдастырады.

Биылғы Наурыз ерекше есте қалды. Хьюстонда алғаш рет қазақстандық әртістердің ауқымды концерті өтті.

Бір сахнада Еңлік, Садраддин, Рауана, сондай-ақ күйші әрі Құрманғазы атындағы Қазақ ұлттық халық аспаптар оркестрінің бас дирижері Абылай Тілепберген өнер көрсетті. Texas Qazaq Foundation шақыруымен ұйымдастырылған концерт мерекенің басты оқиғасына айналып, диаспораның мәдени өміріндегі жаңа кезеңді белгіледі.

Гаухардың айтуынша, уақыт өте келе Хьюстондағы қазақстандықтар бұрынғыдан да жақындай түскен. Олар бір-бірімен араласып, қолдау көрсетеді. Тіпті бір-біріне жақын қоныстанып, өз аудандарын «қазақ ауылдары» деп атай бастады.

Тәжірибе көрсеткендей, туған жерден мыңдаған шақырым алыста жүрсе де, дәстүрлер өз үнін жоғалтпайды. Ұлттық құндылықтар адамдарды біріктіріп, түрлі мәдениет өкілдерінің жүрегінен орын табады.