Облыс орталығында шомылу маусымы басталар алдында құтқару техникасының байқауы өтті, деп хабарлайды @Pavlodarnews.kz.  

Сондай-ақ оның техногендік сипаттағы ықтимал төтенше жағдайларды жоюға дайындығы тексерілді. 

ТЖД жедел-құтқару жасағы басшысының орынбасары Серік Шерияздановтың айтуынша, сүңгуірлік жабдық соңғы 17 жылда алғаш рет сатып алынған. Бұдан бөлек, биыл құтқарушылар үшін облыстық бюджет қаражатына ГАЗель шағын автобусы алынған. 

– Автомобиль қажетті авариялық-құтқару операцияларын жүргізу үшін толық жабдықталған. Құтқару жасағына  үш сүңгуір жиынтығы сатып алынды. Бұл – қыста жұмыс істеуге арналған үш құрғақ костюм, жылы уақытқа арналған үш дымқыл костюм және үш тыныс алу аппараты, – дейді Серік Шериязданов.

Сонымен қатар қосымша мотормен және рульмен жабдықталған Kazboat-42 қайығы сатып алынған. Бұл патрульдеу және рейдтер кезінде ыңғайлы. Жабдық соңғы рет 2006 жылы жаңартылған. Қазіргі уақытта сүңгуір жабдықтарының тағы жеті жиынтығын жеткізуге конкурс өтуде.

Байқауда адамдарды ТЖ аймағынан эвакуациялауға арналған, өтімділігі жоғары КамАЗ базасындағы автобус, қол жетпейтін жерлерде іздеу жұмыстарына арналған Трэкол ровері, екі сүңгуір автомобиль, радиохимиялық қорғаныс көлігі, сүйемелдеу машиналары, катерлер көрсетілді.

Павлодарда барлығы 13 авариялық-құтқару көлігі және 66 қызметкер бар.