«Robotek Grand Tournament-2023» робототехника бойынша республикалық чемпионат Астана қаласында өтті, деп хабарлайды  Рavlodarnews.kz.

Қалалық білім беру бөлімінің мәліметінше,  аталған байқауға Қазақстанның барлық облыстары мен Астана, Алматы және Шымкент қалаларынан 260 оқушы қатысты. 

– Павлодар облысын 14 оқушыдан тұратын 7 команда таныстырды. Чемпионатты Қазақстан Республикасы Оқу-ағарту министрлігінің «Дарын» республикалық ғылыми-практикалық орталығы өткізді. Шараның мақсаты – робототехника, инженерлік ғылымдар және бағдарламалау саласындағы дарынды оқушыларды анықтау және қолдау, – деді білім беру бөлімінде. 

Чемпионат қатысушылары ең танымал 7 санатта бақ сынасты: «Робо-сумо», «Кегельринг-квадро», «Сызық бойынша жарыс», «Биатлон», кіші және үлкен қатысушылар үшін «Эстафета», «Лабиринт». 

Турнир қорытындысы бойынша Павлодар облысының командалары 4 санатта жүлделі орындарға ие болды.

II дәрежелі дипломмен және 70 мың теңге сомасындағы сертификатпен «Лабиринт» санатында Павлодар қаласының № 25 мектебінің 8-сынып оқушылары Дидар Орынғазы мен Абылай Мукин марапатталды. Командаларды дайындаған мектептерге «ROBOTEK.PRO» робототехника курстарының онлайн-платформасына үш айлық мерзімге жазылым берілді.  

Чемпионаттың барлық қатысушылары сертификаттар алды.