Картоп егу көлемі 1,7 мың гектардан 2,1 мың гектарға дейін артты, деп хабарлайды @Pavlodarnews.kz тілшісі.

Өңір басшысы Асайын Байхановтың Железин ауданына жұмыс сапары барысында аудан әкімі Айтуған Шайхимов көктемгі егіс жұмыстарының барысы мен ауданның әлеуметтік-экономикалық дамуы туралы баяндады.

Аудан әкімінің мәліметінше, биыл болжамды егіс алқабы 212 мың гектарды құрайды. Бұл өткен жылмен салыстырғанда 3,2 мың гектарға артық. Ауданда 346 шаруа-фермер қожалығы жұмыс істейді, оның ішінде 122-сі егін шаруашылығымен айналысады.

Сонымен қатар, егіс құрылымында өзгерістер бар: дәнді дақылдар көлемі 120,2 мың гектардан 90,2 мың гектарға дейін қысқарса, майлы дақылдар алқабы 99,6 мың гектарға дейін ұлғайған. Оның ішінде күнбағыс 86,7 мың гектар аумаққа егілген. Қарақұмық алқабы 1,5 мың гектардан 2,8 мың гектарға дейін артқан.

Айтуған Шайхимовтың айтуынша, бұған дейін күнбағыс екпеген көптеген шаруашылықтар биыл майлы дақылдарға басымдық берген.

Сонымен бірге, ауданда картоп егу көлемі 1,7 мың гектардан 2,1 мың гектарға дейін артқан. Көкөніс және бақша дақылдары 200 гектар алқапты алып жатыр.

Өңір басшысы көкөніс шаруашылығының жай-күйіне де назар аударды. Аудан әкімінің сөзінше, «КАП» шаруашылығы 200 гектар аумақта сәбіз өсіруде. Өнімді сақтау үшін қоймалар мен тоңазытқыш жабдықтары орнатылған, қазір тек желдету жүйесін аяқтау жұмыстары қалып отыр. Өткен жылғы өнім көлемі шаруашылықта жоғары бағаланған.

Ауданда мал азығы дақылдары 19,9 мың гектар аумақты алып жатыр. Оның қысқаруы жердің бір бөлігінің майлы дақылдарға ауыстырылуымен байланысты. Дегенмен, аудан әкімі мал азығы бойынша тәуекел жоқ екенін айтты. Шаруашылықтар жеткілікті көлемде шөп дайындауды жоспарлап отыр, сонымен қатар көпжылдық шөптер мен сидералды дақылдар пайдаланылуда.

Көктемгі дала жұмыстарын жүргізуге барлық модификациядағы 318 трактор мен 96 егіс кешені жұмылдырылған.

Бүгінде аудан бойынша тұқымға қажеттілік 24,1 мың тоннаны құрайды. Барлық шаруашылық түрлері бойынша қамтамасыз етілу деңгейі 100 пайызға жеткен. Егіс науқаны 70 пайыздан астам орындалған. 28 мамырдағы жағдай бойынша 44,1 мың гектарға бидай, 9,1 мың гектарға арпа, 5,9 мың гектарға сұлы егілді. Майлы дақылдар 79,1 мың гектар аумаққа орналастырылған, оның ішінде күнбағыс 79,1 мың гектарды құрайды.

Минералдық тыңайтқыштарды сатып алу жұмыстары да жалғасуда. Жоспарланған 18,4 мың тоннаның 12,1 мың тоннасы немесе 65,8 пайызы сатып алынған.

Асайын Байханов егіс науқанының аяқталу мерзімін нақтылады. Ауданда жұмыстарды 5 маусымға дейін толық аяқтау жоспарланып отыр. Сонымен қатар, биыл аграршылар көктемнің ерте келуіне және ғылыми ұсынымдарға сәйкес маусымды бір апта ерте бастаған.

Кеңес барысында мемлекеттік қолдау шаралары да талқыланды. «Демеу» КТ арқылы аудан шаруашылықтарына жалпы сомасы 1 миллиард 338,9 миллион теңгеге тоғыз несие берілген. Ал «Аграрлық несие корпорациясы» АҚ арқылы 2 миллиард 954,2 миллион теңгеге 48 несие рәсімделген.

Аудан әкімінің айтуынша, қаржы шаруаларға ақпан айының соңы мен наурыз айының басында берілген. Бұл техника, жанар-жағармай және қажетті құрал-жабдықтарды уақытылы сатып алуға мүмкіндік жасаған.

Өткен маусым аудан үшін рекордтық жыл болды. Орташа өнімділік гектарына 22 центнерді құрады. Соның нәтижесінде шаруашылықтар техника паркін айтарлықтай жаңартқан. 2026 жылғы 28 мамырдағы жағдай бойынша жалпы сомасы 2,9 миллиард теңгеге 78 бірлік техника сатып алынған.

2026 жылғы көктемгі дала жұмыстарын жүргізу үшін Железин ауданына 4006 тонна арзандатылған дизель отыны бөлінді. Операторлар ретінде «LF-TRADE» ЖШС мен «ТК Парнас» ЖШС айқындалды. Жанармайдың литрі 271 теңгені құрайды, бұл нарықтық бағадан 49 теңгеге арзан.

Бүгінгі күні 4006 тонна дизель отынына немесе 100 пайыз көлемге өтінім берілген. Оның 1885 тоннасы төленіп, 1538 тоннасы жеткізілген. Бұл бағыттағы жұмыстар жалғасуда.

Сонымен қатар, ауданда пайдаланылмай жатқан ауыл шаруашылығы жерлерін қайтару жұмыстары жалғасуда. Айтуған Шайхимовтың айтуынша, бұрын «Агрокапитал» ЖШС иелігінде болған алты мың гектар жер сот арқылы мемлекетке қайтарылған. Қазіргі уақытта бұл учаскелерді ауыл шаруашылығы айналымына енгізу үшін құжаттарды рәсімдеу жұмыстары жүргізілуде. Жердің бір бөлігі аукционға шығарылғанымен, кейбір учаскелер бойынша сот процестері әлі жалғасып жатыр.

Сондай-ақ өңір басшысымен Михайловка ауылы маңындағы пайдаланылмай жатқан шаруа қожалығы жерлерінің мәселесі талқыланды. Аудан әкімінің айтуынша, жердің бір бөлігі әлі де қамауда тұр, ал сот процестері аяқталмаған.

Ауданда көктемгі егіс жұмыстары кезінде жаңа технологиялар да қолданылуда. Атап айтқанда, күнбағыс тұқымдарын электромагниттік өріспен өңдеу тәсілі енгізілген. Бұл технология тұқымның өнгіштігін арттырып, өсімдіктің өсуіне оң әсер етеді. Мамандардың айтуынша, мұндай әдіс өнімділікті 30 пайызға дейін ұлғайтып, дақылдардың қуаңшылық пен ауруларға төзімділігін күшейтеді.