Ол Баянауылдан шыққан блогер әрі фотограф ретінде танымал, деп хабарлайды @Pavlodarnews.kz тілшісі.

Баянауыл ауданына қарасты Қаражар ауылының тұрғыны Есен Жүсіпбаевқа «Туризм саласының үздігі» төсбелгісі табысталды. Бұл марапат Есен үшін күтпеген жаңалық болды. Ол қараша айында Астанаға баруды жоспарлаған еді, алайда министрлік оның жеке жоспарына өзгеріс енгізді.

– Бірнеше күн бұрын маған министрліктен хабарласып, марапаттау рәсіміне шақырды. Әрине, таңғалдым, себебі туризм мен спорт саласына тікелей қатысым жоқ. Мені туған өлкемнің табиғатын фото мен видео арқылы насихаттап, патриоттық тәрбиеге және Баянауыл өңірінің туризмін дамытуға қосқан үлесім үшін марапаттады. Эмоциялар шарықтап тұр, – дейді Есен Жүсіпбаев.

Есен бұл марапатты тек жағымды тосынсый ғана емес, әрі қарай дамуға түрткі болғанын да мойындады.

– Туризм бағытына бет бұрып, осы салада жобалар іске асыру туралы жиі ойланамын. Әзірге алғашқы қадам жасауға қорқамын, бірақ бұл жолға түсеміз деп сенемін, – дейді ол.

Есен мен Зура Жүсіпбаевтар отбасы Павлодар облысы тұрғындарына тек әлеуметтік желіде ғана емес, күнделікті өмірде де жақсы таныс. Ерлі-зайыптылар блогер ретінде дамып, туған өлкенің сұлулығын көрсетіп келеді. Әрбір фото мен видео – Баянауылдың ерекше атмосферасын жеткізетін көрініс.

Олар Қаражар ауылында 25 жылдан бері тұрады. Үйі мен үлкен отбасы – туған жерге деген сүйіспеншіліктің көрінісі. Үйде Есен көптен армандаған ерекше орын бар – үлкен терезесі бар зал. Сол терезеден күн сайын Қаражардың күннің шығуы мен батуы, маусымдардың ауысуы, табиғаттың тынысы көрінеді. Бұл терезе олардың визуалды күнделігіне айналған. «Инстаграмға лайық» залда әр кадрда туған өлкенің жылуы мен жарығы бар.