Ернар мен Ернұр Шаймардан бір миссияны таңдады, ол – азаматтық қорғау қатарында қызмет ету, деп хабарлайды Pavlodarnews.kz тілшісі.

Отыз жастағы жігіттер – Қазақстан Республикасы Төтенше жағдайлар министрлігінің құрдастары. Жастайынан екеуі де өрт сөндіру спортымен айналысты, сол кезде құтқарушы мамандығына деген қызығушылық пайда болды. Мектепті тәмамдағаннан кейін ағайындылар әскерде борышын өтеп, содан кейін жолдары сәл бөлінді.

Ернар бірден өрт сөндіруші болып жұмысқа кірісті. Оның төтенше жағдайлар департаментіндегі қызметі 2017 жылдың 1 ақпанында Павлодар қаласындағы өрт сөндіру бөлімінде басталды. Бүгінде ол – жедел кезекшінің көмекшісі. Алғашқы шақыртуы әлі есінде.

– Алғашқы өрт жеке үйде болды. Шатыры жанып жатты, айнала түтінге толы, шынымды айтсам, қорқынышты еді. Бірақ сол сәтте «адамдарды құтқару керек» деген ой ғана болды. Кейін жарылыс болған цистерналарды сөндіруге де қатыстым, әр минут маңызды еді. Осындай сәттер мамандықта қалуға себеп болады. Жұмысыңның шын мәнінде қажет екенін сезінгенде, өз орныңды түсінесің, – дейді Ернар.

Ол азаматтық қорғау саласын саналы түрде таңдағанын жеткізді.

– Адамдарға қиын сәттерде көмектесу ең маңызды әрі абыройлы міндеттердің бірі деп санаймын. Азаматтық қорғау саласындағы жұмыс – жай ғана мамандық емес, бұл жауапкершілік, күрделі жағдайда әрекет етуге дайындық және қоғамға тірек болуға ұмтылыс, – дейді өрт сөндіруші.

Қауіп-қатерге қарамастан, Ернар өз таңдауына өкінбейді. Ол табиғат апаттарымен күрес кезінде жарақат алған әріптестерін көрді, бірақ бұл оның шешімін тек нығайта түсті.

Ернұр Шаймардан бауырынан бұрын қызметке кірісті. Ол Ресей ТЖМ-нің Мемлекеттік өртке қарсы қызметінің Урал институтын тәмамдап, бүгінде Ақсу қаласының төтенше жағдайлар бөлімінде аға инженер болып жұмыс істейді. Оның еңбек өтілі – 11 жылдан астам.

Алғашқы өрт Ернұр үшін үлкен сынақ әрі маңызды сабақ болды.

– Құтқарушы дұрыс шешімді санаулы секундтарда қабылдауы керек, себебі бұл басқа адамдардың өміріне әсер етеді, – дейді Ернұр. – Сол кезде командалық жұмыстың маңызын түсіндім. Қорқынышты жеңіп, батыл әрекет етуге дәл сол көмектеседі.

Ағайындылар азаматтық қорғау қызметі сынақтар ғана емес, адам өмірін сақтау үшін форманы киюге себеп болатын сәттер екенін айтады. Әсіресе, қызмет бабында кездесетін павлодарлықтардың қарапайым «рахметі» бұл жұмыстың шынайы мәні мен мақтанышы сезіледі.

Олар ағайынды ғана емес, олар – қызметтегі серіктестер. Өмір жолында иық тіресе жүріп, қызмет пен жауапкершілікті бірге бөліседі.