Жұмыстар облыс әкімінің көңілінен шықты, деп хабарлайды @Pavlodarnews.kz.

Аймақ басшысы Баянауылда болып, ауданның негізгі жобаларының іске асырылу барысын тексерді.

Ж. Аймауытов ауылында су сорғы станциясы мен су жүйесін жаңғырту жұмыстары жүріп жатыр. Жоба ауқымды: 9,5 шақырымнан астам қашықтыққа жаңа құбырлар тартылып, Үйтас ауылын қоса алғанда, 138 үй қосылды. 

– Жұмыстар мамыр айында басталды, енді алдағы бірнеше айда толық аяқтауға дейін қарқынды бәсеңдетпеу маңызды. Сол ауылда өткен жылы жүргізілген мектептің кешенді жөндеуінің нәтижесімен де таныстым. Қағазда немесе фотода бәрі мінсіз көрінуі мүмкін, сондықтан уақыт өте сапасының қалай сақталғанын өз көзіммен көргім келді. Жұмыс сапасына көңілім толды, – деп жазды жеке парақшасында Асайын Байханов.

Ол Шонай ауылында су құбырын қайта жаңарту бойынша тағы бір жобаны тексерді. Облыс әкімі мердігерге судың тұрақты берілуін қамтамасыз етуді тапсырды. Оның сөзінше, жұмыстар белгіленген мерзімде – ешқандай сылтаусыз аяқталуы тиіс.

– Аудан орталығынан шығар жолда болашақ сапар-орталығында тағы да болып қайттым. Нысанның дайындық деңгейі – 65%, жұмыстар тоқтаусыз әрі ырғақты жүруде. Атқарылатын жұмыстың сапасын қатаң бақылап, қарқынды бәсеңдетпеуді тапсырдым, – деді аймақ басшысы.

Еске сала кетейік, облыс әкімі баянауылдықтармен кездесу барысында ауданда жыл басынан бері атқарылған жұмыстар туралы баяндаған болатын.