Кейбір елді мекендердің тұрғындарынан шыбын-шіркейге қатысты шағымдар түсуде, деп хабарлайды @Pavlodarnews.kz.

Павлодар облысының әкімі Асайын Байханов санитарлық-эпидемиологиялық жағдай, дезинсекциялық іс-шаралар және өңірдің фитосанитарлық жағдайы мәселелері бойынша жиналыс өткізді.

Жиналыс барысында санитарлық-эпидемиологиялық бақылау департаментінің басшысы Батырбек Әлиев баяндама жасады. Ұсынылған мәліметтерге сәйкес, ауа-райы жылынғаннан бері облыста кене шағудың 173 жағдайы тіркелген. 22 адам ауруханаға жатқызылып, оның 17-де дақ безгегі анықталған.

Павлодар облысы кене энцефалиті және Лайм ауруы бойынша эндемиялық аймақтардың қатарына жатпайтынына қарамастан, инфекцияларды басқа облыстардан әкелу жағдайлары тіркелді. Атап айтқанда, Германия азаматының кене энцефалитін жұқтырғаны анықталды.

Осыған байланысты әкім өңірдің барлық медициналық мекемелерінде кене энцефалитіне қарсы иммуноглобулиннің жеткілікті қорының болуын қамтамасыз етуді тапсырды.

Санитарлық қызметтердің мәліметінше, бүгінгі күні облыста қарақұрт шағу жағдайлары тіркелмеген. Ағымдағы жылдың сәуір айынан бастап Баянауыл ұлттық паркінде энтомологиялық мониторинг жүргізілуде, оның шеңберінде қыстап шыққан қарақұрт жұмыртқаларын жинау және жою жұмыстары жүргізілуде. Профилактикалық өңдеу жұмыстарын Торайғыр ауылдық округінде «Дезус» ЖШС мердігерлік ұйымы жүргізуде.

Денсаулық сақтау басқармасына барлық қажетті дәрі-дәрмектер мен жедел жәрдем құралдарының болуын, сондай-ақ жәндіктердің белсенділігі жоғары болатын маусымға медициналық мекемелердің дайындығын тексеру тапсырылды.

Фитосанитариялық жағдай және зиянкестермен күресу шаралары туралы облыстық аумақтық инспекция басшысы Арман Шуйкенов баяндады. Оның айтуынша, 2025 жылы шегірткелердің үйірлі және саяқ түрлеріне қарсы күрес аясында облыс аумағының 48,3 мың гектарын, оның ішінде 19,6 мың гектарды - шегірткенің итальяндық прус түріне қарсы өңдеу жоспарлануда. Іс-шараларды өткізуге 89,5 миллионнан астам теңге бөлінді, оның 39,6 миллионы республикалық бюджеттен түсті. Өңдеу жұмыстары Май және Баянауыл аудандарында басталды.

Облыс әкімі басқа аудандарда да жылдамдатып өңдеу жұмыстарын бастауды және шегірткелер көрші облыстардың аумақтарынан ауып келетіндей болса қосымша қаражат бөлу мәселесін қарастыруды тапсырды.

Жиналыста тұрғындардың саяжай алқаптарында, сондай-ақ, Ольгинка және Майқайың ауылдарында колорадо қоңыздары мен жапырақ жемірінің пайда болуы туралы өтініштеріне ерекше назар аударылды. Әкім Қаражар ауылында өрмекшілердің жиналуы мүмкін деген ақпаратты тексеруге тапсырма берді, сондай-ақ жергілікті атқарушы органдарға халықтың осындай өтініштеріне жедел ден қоюды тапсырды.

Жиналыстың екінші негізгі тақырыбы қансорғыш жәндіктермен күрес мәселесі болды. Асайын Байханов өңдеуді уақтылы және сапалы жүргізу өңір тұрғындарының денсаулығы мен жайлылығына тікелей әсер ететінін атап өтті.

29 сәуірде басталған әуеден өңдеу жұмыстары аяқталуға жақын. 448 мәрте әуеден өңдеу жоспарланған болатын. Бүгінгі таңда 402 рет әуеден өңдеу жұмыстары жүргізіліп, 154 мың гектар астам жайылма алқабы өңделді. Жұмыстар Павлодар, Ақсу, Павлодар және Ақтоғай аудандарында толығымен аяқталды. Өңдеу Тереңкөл, Ертіс және Железин аудандарында жалғасуда.

Мамандардың бағалауы бойынша әуеден өңдеудің тиімділігі шамамен 90 пайызды құрайды. Әсіресе, шыбын-шіркейдің дернәсілдерін жоюға баса назар аударылды. Мамыр айының ортасында Ертіс өзенінің арнасына және оның тармақтарына 100 мың литрден астам биологиялық препарат құйылды. Биологиялық өңдеудің екінші кезеңі 24-25 мамырға жоспарланған.

Сонымен қатар, 20 мамырдан бастап Павлодар қаласының орталық жағалауында күн сайын күшейтілген тосқауылды өңдеу жұмыстары жүргізілуде. Ақтоғай және Ертіс ауылдарының тұрғындарының өтініштері бойынша қосымша шаралар қабылданды - екі жағдайда да масалардың адам үшін қауіпті емес қоңырау масаларының түріне жататыны анықталды. Аққулы ауданының Шабар және Шәмші ауылдарындағы су айдындарының маңында өңдеуді күшейту тапсырылды.

– Тұрғындардың әрбір өтініші жедел тәртіппен қаралуға тиіс. Жағдайға тұрақты түрде мониторинг жүргізіп, барлық тартылған қызметтер арасында үйлесімді жұмысты қамтамасыз ету қажет, – деп атап өтті облыс әкімі.

Жиналыстың қорытындысы бойынша Асайын Байханов бірқатар тапсырмалар берді: халықпен ақпараттық-түсіндіру жұмыстарын күшейту, әкімдіктердің, санитарлық және табиғатты қорғау қызметтерінің өзара іс-қимылын қамтамасыз ету, облыстың барлық аумағында химиялық және биологиялық өңдеу мерзімдері мен сапасын бақылау.

Фото: Валерий Бугаев