Тұрғындар осы уақытқа дейін құдық суын пайдаланып келген, деп хабарлайды @Pavlodarnews.kz тілшісі.

Ақтоғай ауданы әкімінің орынбасары Дархан Дощановтың айтуынша, 20 тамызда магистральдің жұмысын тексеру және іске қосу-жөндеу жұмыстары жүргізілді. 

– Осыдан кейін су тазарту сүзгілері іске қосылып, ауызсу тікелей тұрғын үйлерге жеткізіле бастады. Жоба аясында құбырларды үйлерге дейін жеткізу, есептегіш құралдар мен басқа да қажетті құрылғыларды орнату қарастырылған. Бүгін біз магистральға ауыз суды толықтай жібереміз, – деді Дархан Дощанов.

Сапалы ауыз сумен ауылдағы 40-тан астам аула қамтамасыз етіледі. Құрылыс жұмыстары өңірдегі тәжірибелі мердігерге сеніп тапсырылған. Ауыл әкімдігі тұрғындар жақын күндері орталықтандырылған су жүйесінің игілігін көре бастайтынын хабарлады.

Жалпы, 2025 жылдың соңына дейін Павлодар облысы толықтай таза ауызсумен қамтамасыз етіледі. Соңғы кезең – 9,1 миллиард теңгеге жоспарланған 18 жоба.

Еске салайық, облыс әкімі Асайын Байханов Ақтоғай ауданына жұмыс сапары барысында нысан құрылысын сапалы жүргізуді тапсырды.

Биыл Ақтоғай ауданына қарасты Шолақсор, Балтасап, Жалаулы, Шілікті, Ақжол және Барлыбай ауылдарында әлеуметтік нысандарды жөндеу жұмыстары жалғасуда. Тексеру барысында аудан басшылығы су және жылу жүйелеріне, сондай-ақ инфрақұрылымның жалпы жағдайына ерекше назар аударды. Бірқатар ауылда техникалық ақаулар – жабдықтардың тозуы, құбырлардың жарылуы, су беру үзілістері тіркелді.