Жөндеу жұмыстары екі ай ішінде аяқталды, деп хабарлайды @Pavlodarnews.kz.

Қалпына келтіру шараларын «Строй Эталон» ЖШС мердігерлік ұйымы атқарды. Жоба аудандық бюджеттен қаржыландырылып, құны 37 миллион теңгені құрайды. Шартқа сәйкес, мердігер компания атқарылған жұмыстарға 24 айлық кепілдік береді.

– Бұл көпір суда қалқып тұратын құрастырмалы нысан болып табылады. Оны толықтай қайта салу емес, ағымдағы жөндеу жұмыстары жүргізілді. Бұған дейін көпір бөліктері суға батып кеткендіктен, алдымен демонтаж жасалды. Әрі қарай бөлшектері тексеріліп, темір табақшалармен нығайтылып, мастикамен өңделіп, толықтай сырланды. Кейін қайта құрастырылып, орнына орнатылды, – деп түсіндірді Көктас ауылының әкімі Амангелді Рүстемов.

Жөндеу жұмыстары келісімшартқа сәйкес мамырда басталып, шілдеде аяқталды. Қазіргі уақытта көпір аумағында шөп шабу жұмыстары басталды. Сонымен қатар, ауыл әкімі Амангелді Рүстемовтің айтуынша, ауыл тұрғындары тарапынан әлеуметтік желілерде айтылған «көпір қайтадан суға батып кетті» деген пікірлер шындыққа жанаспайды. 

– Тек бір фиксатор бөлігінде ақау анықталған. Бұл мәселе кепілдік міндеттемелері аясында жақын арада жойылады,– деді ол.

Қазіргі таңда понтон нық тұр. Кепілдік уақыты ішінде орын алған кез келген ақау толықтай жөнделетін болады. Ауыл әкімінің сөзінше, алдағы уақытта көпірді қайта құру жұмыстары көзделмеген.

Еске сала кетейік, 2024 жылы Көктас ауылында понтон көпірі батып кеткен болатын. Салмағы 110 тонналық понтон көпірі өзен түбінен көтерілді. Ол жағаға шығарылып, қалпына келтіріліп, қайта орнатылды. Техника мен адамдардың қарама-қарсы жағалауға өтуі үшін паромдық өткелдер ұйымдастырылған болатын.