Идеялар арасында белгілі журналист Динара Сәтжанның кәсіпкерлерге арналған шеберлік сағаты, футбол фестивалі мен қала абаттандыру бойынша бастамалары бар, деп хабарлайды @Pavlodarnews.kz.

10 қаңтардан 9 ақпанға дейін 16 жасқа толған Ақсу қаласының әрбір тұрғыны tugan-qala.kz/aksu сайтында өзіне ұнайтын жобаға дауыс бере алады. Ең көп дауыс жинаған жеңімпаз жобалар биыл іске асырылады. Инфрақұрылым саласындағы ең пайдалы және қажетті жобаларды ERG компаниясы мен әкімдік тарапынан қаржыландырылады.

Сайтта ұсынылған 31 жобаның ішінде бір жоба үшін тек бір рет дауыс беруге болады. Ұсыныстар былтыр жіберіліп, сараптамалық кеңестің  зерттеуінен өтті. Бүгінде ең көп дауыс «Құс қоңырауы» балалар суретінің ХV республикалық экологиялық байқауы жобасы жинады. Бұл шараның өтуін қалайтындар 33 дауыс беріп үлгерді. Халықаралық құстар күніне арналған экологиялық байқау фестивалі өлкенің табиғи байлығына ұқыпты қарауды қалыптастыру мақсатында өткізілмек. 

Ал Әуезов көшесі, 81 мекенжайы бойынша әмбебап спорт алаңын салу жобасына 27 дауыс берілді. Әуезов ауласының тұрғындары балалар мен ересектердің салауатты өмір салты үшін әмбебап спорт алаңын орнатқысы келеді. Жобаны іске асыру үшін футбол, баскетбол, волейбол және жарықтандыру алаңын сатып алу және орнату жоспарлануда.

Жобалар арасында екі футболшыға арналған мүсін ескерткішін қалпына келтіру, «Mama Party» отбасылық шарасы, велосипед үшін жабық тұрақтарын орнату, Динара Сәтжаннның кәсіпкерлерге арналған шеберлік сағаты және тағы да басқа бастамалар бар. 

Айта кетейік, жобаларды іске асыру келесі жылдың мамыр айында басталады. 

Айта кетерлігі, барлық жобалар немесе іс-шаралар тек Ақсу қаласында өтуі тиіс.