Аталмыш іс-шаралар табиғи өрттердің алдын алуға бағытталған, деп хабарлайды @Pavlodarnews.kz тілшісі.

Өрт қаупі жоғары кезеңнің басталуына орай Баянауыл ауданында профилактикалық іс-шаралар өтуде. Аудан әкімінің орынбасары және азаматтық қорғау майоры, аудандық төтенше жағдайлар бөлімінің бастығы Ұзынбұлақ, Сәтбаев және Жаңажол ауылдық округтерінде шаруа қожалықтарының басшыларымен және диқандармен кездесулер ұйымдастырды.

Кездесулерде ауыл шаруашылығы жұмыстарына дайындық кезінде өрт қауіпсіздігі нормалары мен талаптары түсіндірілді. Сондай-ақ, жиында сабан мен құрғақ өсімдіктерді өртеуге тыйым салуға, егістік пен жайылым маңындағы аумақтарды өртке қарсы жырту және шабуға, ауыл шаруашылығы техникасын алғашқы өрт сөндіру құралдарымен жабдықтауға, өрт шыққан жағдайда әрекет ету тәртібі сияқты мәселелерге ерекше назар аударылды. 

– Әр тұрғын мен жер иеленуші өз жауапкершілігін түсініп, өрттің алдын алу үшін барлық қажетті шараларды қолдануы маңызды. Өрт қауіпсіздігі ережелерін сақтау – егінді, мүлікті және ең бастысы, адам өмірін қорғаудың кепілі, – дейді ТЖБ қызметкерлері.

Іс-шара барысында ТЖБ қызметкерлері қатысушыларға өрт қауіпсіздігі ережелерін сақтау қажеттігін еске салып, арнайы жадынамалар таратты және тұрғындардың сұрақтарына жауап берді.

Айта кетейік, ауданда профилактикалық жұмыстар жалғасуда.