Жаңатілек ауылында 223 шам орнатылады, деп хабарлайды  @Pavlodarnews.kz тілшісі.

Павлодар облысының әкімі Асайын Байхановтың Баянауыл ауданының тұрғындарымен тұрақты кездесуінде Жаңатілек ауылы тұрғындарының бірі жарықтандыру мәселесін көтерді. 

– Көше қараңғы, иттер көп, балалар әзер өтеді, – деді ол.

Аймақ басшысы «Ауыл – ел бесігі» бағдарламасы бойынша ауыл толығымен жарықтандырылатынын жеткізді. 

– Алла жазса, ауыл Лас-Вегас сияқты жарқырайды. Күндіз жүргендей боласыздар. Қай шетте жүрсеңіздер де көрініп қаласыздар, – деді облыс әкімі.

Ауыл ішіндегі көше жарығы бойынша мемлекеттік сатып алуды «Хлебстрой» ЖШС жеңіп алған, шарт сомасы – шамамен 114 миллион теңге. Мердігер келесі жылдың сәуір айында жұмысқа кіріседі. Негізгі көшелер жарықтандырылады, төрт айдың ішінде 223 шам орнату жоспарланып отыр. Биіктігі – 11 метр, тіректер арасындағы қашықтық – 30 метр. Сонымен қатар, Жаңатілек ауылында 4,5 шақырымнан астам кентішілік көшелер күрделі жөндеуден өтеді. Жолдың ені – бес метр. Ауылдың басты көшелерінде асфальт төселеді. Мердігер ретінде «Екібастұзтеплоэнергомонтаж» ЖШС анықталды. 

Асайын Байханов мердігердің тәжірибелі болуы және барлық жоспарланған көлемді уақтылы және сапалы орындауы тиіс екенін атап өтті.