Жыршы-термеші Таңат Ахатов 50 жас мерейтойына орай «Өмірімді өлеңмен өрнектедім» атты шығармашылық кешін өткізді, деп хабарлайды  @Pavlodarnews.kz тілшісі.

Кеш барысында қаламгердің тереңнен тамыр тартқан тарихты, тұмса табиғатты, дала дарындарын жырлаған «Жасыбай толқындары» жыр жинағының тұсауы кесіліп, қалың оқырманға таныстырылды.

– Елге танымал Таңат Ахатов бүкіл іс-шараның басында жүретін. Мәдениет саласында болсын, білім саласында болсын, ерең еңбек етіп жүрген азаматтың бірі. Ердің жасы 50-ге келіп отыр. Зиялы қауым атынан, ғалымдар атынан Таңат бауырымызды 50 жас мерейтойымен құттықтаймыз. Шығармашылық табыс, деніне саулық тіейміз. Тек қана жақсылық болсын! – деді «Мәшһүртану» ғылыми-практикалық орталығының жетекшісі Ертай Жүсіп.

Өрелі өнер көрсетілген кеште ақынға құрмет көрсетілді. Таңат Қуанұлына «Павлодар облысына және Баянауыл ауданына сіңірген еңбегі үшін» медалі тағылды. Сонымен қатар, ақын Мәшһүр Жүсіп қорының медалімен де мәртебеленді.

Ақынның журналистік қыры Қазақстан Журналистер одағының куәлігімен расталды. Сонымен қатар, Павлодар қаласындағы баянауылдық азаматтар ақынға ат мінгізіп құрмет көрсетсе, залдағы қауым қол шапалақтап қолпаштауымен мерейін өсірді.