Бұл шара «Үміт үзбеу» қоғамдық қорының 15 жылдығына орай ұйымдастырылады, деп хабарлайды @Pavlodarnews.kz тілшісі.

Ұйымдастырушылардың мәліметінше, ерекше қажеттіліктері бар балалар мен жастарға арналған байқау «Кедергісіз келешек» атты өнер мен қолданбалы шығармашылықтың бірінші қалалық ашық фестиваль-байқауы аясында өтеді.

Фестивальдің негізгі мақсаты – ерекше қатысушылардың шығармашылық қабілеттерін анықтау, олардың мәдени құндылықтарға тартылуы арқылы әлеуетін ашу, тең мүмкіндіктер жасау, сондай-ақ қоғам назарын әлеуметтік бейімделу мен интеграция мәселелеріне аудару.

7-16 және 17-25 жас аралығындағы қатысушылар вокал және би өнері, көркем сөз, бейнелеу және сәндік-қолданбалы шығармашылық және басқа да номинациялар бойынша өнер көрсете алады.

Барлық номинацияларда конкурс бағдарламасы ұзақтығы 4 минуттан аспайтын бір шығарманы қамтиды. «Көркем сөз» номинациясында – бір туынды немесе әдеби-музыкалық композиция ұсынылады. Вокалдық өнерде міндетті шарт – тірі орындау.

Өтінімдер 30 шілдеге дейін қабылданады.

Фестиваль 4 қыркүйек күні сағат 16:00-де Естай атындағы мәдениет сарайында өтеді.

Қосымша ақпаратты келесі нөмірлер арқылы білуге болады:

8 (775) 580-28-03, 8 (701) 408-22-63, 8 (777) 934-68-58.