Сайысқа жергілікті зиялы қауым өкілдерінен құрылған азаматтар қазылық етеді, деп хабарлайды @Pavlodarnews.kz.

2 желтоқсанда сағат 11:00-де С.Баязитов атындағы балалар оқу орталығында балалар жазушысы, Қазақстан Жазушылар одағының мүшесі, кітапханаға есімі берілген қаламгер – Сүлеймен Баязитовтің шығармашылығын насихаттауға арналған «Баязитов оқулары» байқауы өтеді. 

Байқауға қала мектептерінің 7-15 жастағы өнерпаздары қатысып, ақынның шығармаларын жатқа оқудан сынға түседі. 

Сонымен қатар, шараға Сүлеймен Баязитовтің жары  Рымкеш Мәдиева мен ақынның туған-туыстары қатысады.

Сүлеймен Баязитов 1944 жылы 2 желтоқсанда Баянауыл ауданының Жұмат Шанин ауылында туған. 

1971 жылы Баянауыл аудандық «Жеңіс»(қазіргі «Баянтау») газетінде әдеби қызметкер, бөлім меңгерушісі, редактордың орынбасары, 1997-1999 жылдар аралығында облыстық «Сарыарқа самалы» газетінде тілші болып қызмет еткен. 1999 жылдан бері Красноармейка орта мектебінде қазақ тілі мен әдебиеті пәні бойынша мұғалім болып қызмет етті.

Алғашқы әңгіме, өлеңдері 1962-1963 жылдары «Тың өлкесі» газетінде жарық көріп, содан бері әңгіме, аңыз, повестері аудандық, облыстық, республикалық газет-журналдарда жарияланып келді. 1972 жылы Павлодар қаласында өткен жас ақын-жазушылардың республикалық, аймақтық кеңесіне қатысқан. Ақынның «Бастау», «Жасыбай батыр», «Құдіреті күшті бір Алла», «Елсіздегі елес», «Хан ием», «Жаралы жердің жанары», «Көне қазақтың қыңыр қисыны» атты және тағы да басқа жинақтары жарық көрген.

Бүгінде С.Торайғыров атындағы облыстық кітапханаға қарасты балалар әдебиетінің жеке ғимараты қаламгердің есімімен аталады.