Өңірде өзге облыстармен салыстырғанда бірнеше есе артық, яғни мыңнан астам қандасты қабылдау жоспарлануда, деп хабарлайды @Pavlodarnews.kz тілшісі.

ҚР Еңбек және халықты әлеуметтік қорғау министрінің бұйрығымен қандастар мен қоныс аударушыларды қабылдаудың 2025 жылға арналған өңірлік квотасы 9 653 адам деп белгіленді. Бұл – былтырғы жылмен салыстырғанда 170 адамға артық.

– Бұйрықтың мақсаты Қазақстан Республикасы Үкіметі айқындайтын өңірлерде қандастар мен қоныс аударушыларды оңтайлы қоныстандыру, – деп жазылған хабарламада. 

2025 жылы өңірлік квота  қандастар үшін Павлодар облысында – 1 056 адамға, Ақмола облысында – 285 адамға, Шығыс Қазақстан облысы – 269 адамға, Абай облысына – 244 адамға, Солтүстік Қазақстан облысы – 175 адамға, Қостанай облысында – 150 адамға,  Атырау облысында – 100 адамға және Батыс Қазақстан облысында 30 адамға бөлінді. 

Ал қоныс аударушылар үшін Павлодар облысында – 3 050 адамға, Солтүстік Қазақстан облысында – 2 969 адамға, Қостанай облысында – 535 адамға, Шығыс Қазақстан облысында – 372 адамға, Абай облысында – 255 адамға, Ұлытау облысында – 125 адамға, Қарағанды облысында 38 адамға бөлінген.

Қандастар мен қоныс аударушыларды қабылдаудың өңірлік квотасына енгізілген адамдарға қандай мемлекеттік қолдау шарасы көрсетілетін болады?

- көшуге субсидиялар – отбасының әрбір мүшесіне 70 АЕК бойынша біржолғы төлем;

- 12 ай ішінде бір отбасына 15-тен 30 АЕК-ке дейін төленетін тұрғын үйді жалдау (жалға алу) және коммуналдық қызметтерге ақы төлеу бойынша шығыстарды жабу үшін субсидиялар;

- 400 АЕК мөлшерінде қоныс аударуға жәрдем көрсететін жұмыс берушілер үшін субсидиялар;

- қысқа мерзімді кәсіптік оқытуға жолдама;

- жұмысқа орналасуға немесе кәсіпкерлік бастаманы дамытуға жәрдемдесу;

- тұрғын үй сатып алуға экономикалық мобильділік сертификаттарын беру.

2024 жылы 19,7 мыңнан астам этникалық қазақ тарихи отанымен табысып, қандас мәртебесін алды.

1991 жылдан бастап 2025 жылғы 1 қаңтар аралығында 1 млн 148 мың астам этникалық қазақ тарихи отанына оралды.

Естеріңізге сала кетейік, қандастарды қабылдаудың 2024 жылға арналған 1250 өңірлік квота 100 пайызға игерілген