Он жыл бойы аулалардың басым бөлігінде жарық болмаған, деп хабарлайды @Pavlodarnews.kz тілшісі.

Асайын Байханов Екібастұзға барған жұмыс сапары барысында қаладағы абаттандыру жұмыстарының барысымен танысты. Шаһарда жолдар жөнделіп, инженерлік желілер жаңартылып, аулалар абаттандырылуда. 

— Өткен жылы шамамен 10 шақырым жолды жөндедік, биыл тағы 15 шақырымға қаржы бөлінді. Жалпы 20 шақырымнан астам жол әлі де жөндеуді қажет етеді. Ең көп тозған учаскелерді кезең-кезеңімен қамтып келеміз, — деді Асайын Байханов.

Асфальт зауыты бүгінде қажетті көлемдегі материалмен қамтамасыз етуде. Биылғы жоспар бойынша 150 мың шаршы метрге дейін асфальт төселмек. 

Проблемалы бағыттың бірі – иесіз желілер. Облыс басшысының сөзінше, алдымен қолдағы ескі желілерді ретке келтіру жоспарланып отыр.

Соңғы екі жылда 100-ден астам аула абаттандырылып, жарық шамдары, ойын және спорт алаңдары орнатылды.

— 2018–2020 жылдары аулаларға бірыңғай стандарт қойылмаған еді. Кейбірінде балалар алаңқайының астында әлі күнге дейін топырақ жатыр, жауыннан кейін кір подъездерге барады. Қазір біз тек заманауи талаптарға сай жөндеу жұмыстарын жүргізіп жатырмыз. Атап айтқанда: қатты негіз, жарықтандыру, кемінде 11 ойын элементі, орындықтар мен қоқыс жәшіктері, – деді Асайын Байханов.

2027 жылға дейін Екібастұздағы 270 аула толықтай асфальтталып, балалар ойын және спорт алаңдарымен, шағын скверлермен қамтамасыз етілмек. Ал бірқатар аулаларда жарық шамдары орнатылып, тұрғындардың қауіпсіздігі артып келеді.

— Энергетиктер қаласы бола тұра, ондаған жыл бойы аулалар қараңғы болып келгені ұят жағдай еді. 2022–2023 жылдары шамдар орнатуды бастадық. Қазір ондаған аула жарықтандырылды, ал келесі жылы бұл мәселені толық шешеміз, — деді аймақ басшысы.

Жұмыс жеке секторда да жалғаспақ. Мұнда су құбыры мен кәріз жүйесін салу өзекті.

— Бүгінде бізде қаланың дамуына қатысты айқын жоспар бар. Алдымен инженерлік желілерді ретке келтірдік, енді аулаларды кешенді абаттандыруға кірістік. Алдағы уақытта жеке секторды да біртіндеп шешетін боламыз, — деді Асайын Байханов.

Жалпы жолдарды жөндеуге облыс қаражатынан бір миллиард 216 миллион теңге қаржы бөлінді.