Жобалар нақты жағдайларды ескере отырып қолдау табуда, деп хабарлайды @Pavlodarnews.kz тілшісі.

Агроөнеркәсіптік кешенді дамыту мемлекеттік инвестициялық саясаттың басым бағыттарының бірі болып қала береді. Себебі елімізде ауыл шаруашылығы тауарын өндірушілерді қолдау шаралары кеңейтіліп, оның ішінде жеңілдетілген несие алу мүмкіндіктері артып келеді. Бұл жаңа өндірістерді іске қосып, ауыл шаруашылығы шикізатын өңдеуді дамытуға мүмкіндік береді.

Павлодар облысында да аграрлық саладағы инвестициялық белсенділік артып келеді. Жеті айдың қорытындысы бойынша ауыл шаруашылығындағы негізгі капиталға салынған инвестиция көлемі 105 миллиард теңгеден асты. Жыл соңына дейін бұл көрсеткішті 255 миллиард теңгеге жеткізу жоспарланып отыр.

АӨК-тегі жаңа жобаларды қаржыландыруға да ерекше көңіл бөлінуде. Бұл мақсатқа 8 миллиард теңге қарастырылған. Оның 3 миллиард теңгесі Солтүстік Қазақстан облысының тәжірибесін ауқымдауға, тағы 5 миллиард теңгесі агроөнеркәсіптік кешендегі инвестициялық жобаларды жүзеге асыруға бағытталады.

Мұндай жобаларды іріктеу және сүйемелдеу мәселелерін АӨК саласындағы жобаларды іріктеу жөніндегі облыстық комиссия қарайды. Шешім қабылдау кезінде мамандар тек қаржылық көрсеткіштерді ғана емес, кәсіпорындардың нақты өндірістік мүмкіндіктерін, жобаларды іске асыру мерзімдерін және олардың әрі қарай жұмыс істеу перспективаларын да ескереді.

Өңір үшін маңызды жобалардың бірі – Ақсу қаласында «Ертіс Агро» АӨК-нің май экстракциялау зауытын салу жобасы. Кәсіпорын күнбағыс, рапс, зығыр және мақсары майын өндіреді. Жоба «Павлодар» ӘКК» АҚ қолдауымен жүзеге асырылуда және ауыл шаруашылығы кооперациясы қағидаттары негізінде іске асырылып жатқан өңірдегі осы бағыттағы алғашқы ірі пилоттық жоба болып саналады.

Жобаның жалпы құны 1 миллиард 870 миллион теңгені құрайды. Оның ішінде 450 миллион теңге – кооперативтің өз қаражаты, тағы 1 миллиард 420 миллион теңге жеңілдетілген несие түрінде берілген.

Бастапқыда зауытты 2026 жылғы маусымда іске қосу жоспарланған болатын. Алайда Қытайдан технологиялық жабдықтардың бір бөлігін жеткізу мерзімінің кешігуіне байланысты жоба мерзіміне түзету енгізілді. Бұған халықаралық логистикаға байланысты және кооперативке тәуелсіз себептер әсер еткен.

Қазір құрылыс және жабдықтарды монтаждау жұмыстары аяқталуға жақын. Пайдалануға беру алдындағы іске қосу-баптау жұмыстары басталуда. Оған қосымша уақыт қажет, өйткені жабдықтарды жүктеме кезінде тексеріп, технологиялық режимдерді реттеу, шикізатты сынақ ретінде өңдеу және анықталған техникалық кемшіліктерді жою қажет.

Осыдан кейін кәсіпорын тұрақты өндірістік көлемге шығып, дайын өнімді өткізуді жолға қоюы тиіс. Тұрақты ақша ағымы қалыптасқан жағдайда ғана несие бойынша міндеттемелерді толық көлемде орындауға мүмкіндік пайда болады.

Осыған байланысты «Ертіс Агро» АӨК негізгі қарызды өтеуді 2027 жылғы қаңтарға ауыстыруды сұрап өтініш білдірді. Бұл ретте несие сомасын өзгерту немесе міндеттемелерден бас тарту туралы сөз болып отырған жоқ. Өзгеріс тек төлем кестесін кәсіпорынды нақты іске қосу мерзімдеріне сәйкестендіру қажеттілігіне байланысты.

Сонымен қатар АӨК саласындағы инвестициялық жобаларды несиелеудің қолданыстағы қағидаларында негізгі қарызды өтеу бойынша 24 айға дейін жеңілдік кезеңі қарастырылған. Осылайша, сұралып отырған өзгеріс белгіленген талаптарға қайшы келмейді.

Мәселе АӨК саласындағы жобаларды іріктеу жөніндегі облыстық комиссияның қарауына шығарылды. Шешім қабылдау кезінде кооперативтің өндірістік мүмкіндіктері, майлы дақылдардың жаңа түсімінің перспективалары, элеватордың жағдайы және кәсіпорынның іске қосылуға жалпы дайындығы ескерілді.

«Павлодар» ӘКК» АҚ мен облыстық ауыл шаруашылығы басқармасы да төлем кестесін түзетуді қолдады. Қарау қорытындысы бойынша комиссия негізгі қарыз бойынша алғашқы төлемді 2027 жылғы қаңтардың басына ауыстыруды мақұлдады.

Мұндай шешім кәсіпорынға іске қосу-баптау жұмыстарын аяқтауға, қажетті айналым қаражатын қамтамасыз етуге және бастапқы кезеңде қосымша қаржылық салмақ түсірмей, тұрақты өндірістік режимге шығуға мүмкіндік береді.